Mu rugo rwa Omar al-Bashir wahoze ayobora Sudan bahasanze miliyoni 130 z’amadorari

Omar al-Bashir arashinjwa kwigwizaho amafaranga binyuranye n'amategeko Uwufise ububasha kw’isanamu @Radiodabanga
Image caption Omar al-Bashir arashinjwa kwigwizaho amafaranga binyuranye n'amategeko

Mu rugo rwa Bwana Omar al-Bashir wahoze ayobora Sudan bahasanze ibipfunyika by'amafaranga anyuranye yose hamwe agera kuri miliyoni 130 z'amadorari y'Amerika.

Ubushinjacyaha buvuga ko ari gukurikiranwa ku cyaha cyo kwigwizaho amafaranga binyuranye n'amategeko.

Inzego z'umutekano zagaragaje ko zasanze inoti nyinshi z'ama-euros, amadorari n'amapawundi ya Sudan mu rugo rwa Bwana Bashir yose ateranyije agera kuri miliyoni 130 z'amadorari y'amerika.

Uyu mugabo wategekaga Sudan yarafunzwe nyuma yo guhirikwa kubera imyigaragambyo yari imaze amezi ane. Hari amakuru avuga ko ubu afungiye muri gereza irindwa cyane yitwa Kobar.

Reuters yatangaje ko amakuru ikesha umwe mu bantu bari mu rwego rw'ubutabera muri Sudan avuga ko kwa Bwana Bashir bahasanze amasanduko arimo inoti zingana na $351,000, izingana na miliyoni esheshatu z'ama-euro (€6m) na miliyari eshanu z'amapawundi ya Sudan.

Uyu yemeje ko ubushinjacyaha bushobora gutangira 'guhata ibibazo Bwana Bashir aho afungiye muri gereza ya Kobar'.

Hari amafoto yagaragajwe na Radio Dabanga ikorera mu Buholandi agaragaza abasirikare berekana amafaranga bavanye mu rugo rwa Omar al-Bashir.

Nubwo hari umuhate wo gukurikirana Bwana Bashir n'abafatanyaga nawe, ubutegetsi bw'inzibacyuho buyobowe n'abasirikare ntabwo bwishimiwe n'abigaragambya bavuga ko bashaka ubutegersi bwa gisiriviri.

Alastair Leithead, umunyamakuru wa BBC uri i Kharthoum, avuga ko abantu benshi bakomeje kwigaragambya mu mihanda muri uyu mugi kuko ubutegetsi butarahabwa abasiviri.

Abigaragambya kandi ngo ntibizeye ko Bwana Bashir afunzwe kuko nta kimenyetso kibihamya barabona, ndetse abajenerari bafite ubutegetsi ntibabaha ikizere cyo kuburekura.

Umushinjacyaha mukuru muri Sudan yasohoye itangazo kuri uyu wa gatandatu rivuga ko Bwa Bashir ari gukorwaho iperereza ku cyaha cyo kwigwizaho amafaranga binyuranye n'amategeko nyuma y'uko ariya yose abonetse mu rugo rwe.

Omar al-Bashir wari umaze imyaka 30 ku butegetsi, yahiritswe tariki 11 z'uku kwezi kubera igitutu cy'imyigaragambyo y'abatamushaka yatangiye mu mpera z'umwaka ushize.

Ishyirahamwe ry'abanyamwuga muri Sudan (Sudanese Professionals Association, SPA) riyoboye abigaragambya rivuga ko kuri iki cyumweru riri butangaze uko gusimbura ubutegetsi bw'abasirikare buriho bigiye gukorwa.

Ahmed Rabi uyoboye SPA yatangarije Ibiro ntaramakuru by'Abanyamerika ko we n'abandi bayoboye abigaragambya kuri uyu wa gatandatu babonanye n'akanama ka gisikare kayoboye Sudan.

Ni inama ya gatatu ibahuje ariko nta bwumvikane buragerwaho ngo imyigaragambyo ihagarare.

SPA ivuga ko ifite impungenge ko ubutegetsi bwajyaho bwaba bwiganjemo inshuti za Omar al-Bashir.

Umuvugizi wa SPA yabwiye BBC ko badashaka ko akanama ka gisirikare kayobora igihugu kandi bifuza ko inzego z'ubutasi abazikoragamo bose bavamo n'abategekanaga na Bwana Bashir bose bakavaho.‏

Ibindi bisa n’ibi