Hashize iminsi itatu umunyamakuru Tuyishimire wo mu Rwanda aburiwe irengero

Tuyishimire Constantin Uwufise ububasha kw’isanamu TuyishimireConstantin/Facebook
Image caption Umunyamakuru Tuyishimire Constantin yarabuze kuva kuwa kabiri

Umunyamakuru Constantin Tuyishimire wa Radio Teveleviziyo One izwi cyane nka TV1 mu Rwanda hashize iminsi itatu aburiwe irengero nk'uko iki gitangazamakuru kibivuga.

Abakoresha b'uyu munyamakuru batangaje ko bamuheruka kuwa kabiri agiye kukazi ke ko gutara amakuru yakoreraga mu karere ka Gicumbi mu majyaruguru y'u Rwanda.

Urwego rushinzwe ubugenzacyaha mu Rwanda ruvuga ko ruri gukurikirana ibura ry'uyu munyamakuru.

Umunyamakuru ukorana na Constantin Tuyishimire, yabwiye BBC mu gitondo cy'uyu munsi kuwa gatanu ko kugeza ubu mugenzi we atarongera kuboneka kuva kuwa kabiri ubwo baheruka kuvugana.

Uyu munyamakuru utifuje gutangazwa umwirondoro yagize ati: "Ntabwo araboneka, umugore we n'abana be barahangayitse kandi bafite ubwoba bwinshi bw'uko hari inkuru mbi ye bakumva".

Constantin Tuyishimire wo mu kigero cy'imyaka 30, yigiye itangazamakuru muri kaminuza y'u Rwanda, yimenyereje umwuga kuri Radio Salus, yakoze kandi kuri Radio Umucyo mbere yo kujya kuri TV1.

Umunyamakuru n'umunyapolitiki

Kuwa mbere, Eugène Ndereyimana uhagarariye ishyaka FDU-Inkingi -ritavuga rumwe n'ubutegetsi mu Rwanda - mu burasirazuba bw'u Rwanda, yaburiwe irengero ubwo yari agiye gukoresha inama mu karere ka Nyagatare.

Mu gitondo cy'uyu munsi kuwa gatanu Madamu Victoire Ingabire uyobora iri shyaka FDU-Inkingi ritaremerwa n'amategeko mu Rwanda, yabwiye BBC ko kugeza ubu Ndereyimana ataraboneka.

Modeste Mbabazi, umuvugizi w'urwego rushinzwe ubugenzacyaha mu Rwanda yabwiye BBC ko uru rwego ruri gukurikirana ibura ry'aba bantu bombi.

Ku ibura rya Tuyishimire yagize ati: "Nta makuru mashya turabona, ntabwo araboneka niyo makuru dufite nonaha[mu gitondo cya none].

Bwana Mbabazi yavuze ko kuwa gatatu bashyikirijwe ikirego cyo gushakisha Ndereyimana, kandi ko abagenzacyaha bahise batangira kugikurikirana, ariko ko kugeza ubu nta makuru mashya barabona kuri uyu mugabo.