Boeing igomba kwishyura miliyari $5 kubera indege zayo za Max zahagaritswe

Indege za Boeing 737 Max zarahagaritswe hose ku isi Uwufise ububasha kw’isanamu Getty Images
Image caption Indege za Boeing 737 Max zarahagaritswe hose ku isi

Kompanyi ikora indege ya Boeing igomba kwishyura miliyari 4,9 z'amadorari ya Amerika kubera indege zayo za 737 Max zakoze impanuka izisigaye zigahagarikwa kongera kuguruka ku isi.

Boeing iri guhura n'ibibazo itigeze igira mu mateka yayo nyuma y'uko indege zayo za 737 Max, ari nabwo bwoko ikora yagurishije kurusha izindi, ubu zahagaritswe hose kubera impanuka zazo.

Biteganyijwe ko Boeing mu cyumweru gitaha izagaragaza ko nta nyungu ikibona mu itangazo ku buryo ihagaze isohora buri mezi ane.

Boeing ariko yatangaje ko icyizere ifite kugeza ubu ari uko ziriya ndege zizongera kwemererwa kuguruka mu mezi atatu ya nyuma y'uyu mwaka.

Indege za Boeing z'ubwoko bwa 737 Max zakoze impanuka mu kwezi kwa 10 gushize muri Indonesia ndetse no mu kwezi kwa gatatu uyu mwaka muri Ethiopia zihitana abantu bose hamwe 346.

Abakoze iperereza kuri izi mpanuka bagaragaje ko zatewe n'uburyo bwo kugenzura iyi ndege mu gihe imaze kuva ku butaka iri gufata ikirere, uburyo Boeing ngo itari yarakoze uko bikwiye.

Menshi muri ziriya miliyari $4,9 azishyurwa abakiriya ba Boeing kubera impinduka z'ingendo z'indege n'ibyo zagombaga gutwara.

Ingendo zahagaritswe

Boeing ivuga ko ikomeje gukorana n'abategetsi mu by'indege kugira ngo indege zayo za 737 Max zibashe gusubira mu kirere. Ibi ngo yizeye ko bizashoboka mu gihembwe cya nyuma cy'uyu mwaka.

Gusa, ejo kuwa kane mu ijambo rye, umunyamabanga wa Leta ushinzwe ubwikorezi yumvikanishije ko atizeye ko ziriya ndege zizemererwa kuguruka muri uyu mwaka.

Kompanyi zinyuranye zakoreshaga indege za 737 Max byabaye ngombwa ko zihagarika ingendo zazo zitandukanye, ibi bizishyira mu gihombo mu buryo bunyuranye.

Ejo kuwa kane, kompanyi yitwa Southwest Airlines yo muri Amerika, kompanyi ikoresha indege za 737 Max kurusha izindi, yagenje nka ngenzi zayo zindi zo muri Amerika ihagarika izindi ngendo nyinshi kugeza mu kwezi kwa 11 uyu mwaka.