'Makenzi' na Abouba Sibomana bagiye mu ikipe ivuye mu kiciro cya kabiri

Makenzi na Abouba Uwufise ububasha kw’isanamu Wazito FC
Image caption Makenzi na Abouba bazakina mu ikipe imwe

Uwahoze ari kizigenza w'Intamba mu Rugamba z'u Burundi Nizigiyimana Karim bahimba Makenzi hamwe na Abouba Sibomana w'ikipe y'u Rwanda Amavubi bashyize umukono ku masezerano yo gukinira ikipe ya Wazito FC yo muri Kenya.

Aba ni ba myugariro, b'ibumoso (Abouba) n'iburyo (Karim), bombi bakinanye mu ikipe ya Gor Mahia, ndetse bakinanye mu ikipe ya Rayon Sports. Ni abakinnyi bazwi cyane mu Rwanda.

Abouba Sibomana na Nizigiyimana bari bamaze iminsi bakora imyitozo bageragezwa n'iyi kipe ubu izakina ikiciro cya mbere muri Kenya, ibarizwa mu mujyi wa Nairobi.

Nizigiyimana aheruka kugaragaza mu mikino y'igikombe cya Afurika mu Misiri mu ikipe y'igihugu cye, yakinishwaga nk'umusimbura.

Nizigiyimana ni umukinnyi ufite inararibonye, yatangiye gukina nk'akazi mu ikipe ya Vital'O mu 2006, akinira andi makipe nka APR FC, Kiyovu Sports, Rayon Sports na Gor Mahia.

Solomon Alubala umuyobozi w'imikino wa Wazito FC yatangaje ko aba bakinnyi bombi ari inyongera nziza ku ikipe yabo kuko bafite ubunararibonye, nk'uko bitangazwa n'iyi kipe.

Wazito FC uyu mwaka izakina ikiciro cya mbere nyuma y'uko umwaka ushize w'imikino ibaye iya mbere mu kiciro cya kabiri.

Iyi kipe yashinzwe mu 2011, ikina amarushanwa yo hasi hamwe n'ikiciro cya kabiri, mu 2017/2018 nibwo bwa mbere yazamutse mu kiciro cya mbere ariko irangiza mu za nyuma yongera kumanuka.

Mu mwaka w'imikino ushize nibwo yongeye kuzamuka, Makenzi na Abouba bakazayikinira mu kiciro cya mbere kuri iyi nshuro ikigarutsemo bwa kabiri.

Ibindi bisa n’ibi