Mme Denise Nkurunziza yafunguye 'consulat' y'u Burundi muri Australia

Madamu Denise Bucumi Nkurunziza Uwufise ububasha kw’isanamu Victory Life Centre
Image caption Madamu Denise Bucumi Nkurunziza (imbere hagati) ibumoso bwe hari umushoramari Barry Court

Madamu Denise Bucumi Nkurunziza umugore wa Perezida w'u Burundi niwe wari umushyitsi mukuru mu gufungura ibiro by'uhagarariye inyungu z'u Burundi i Perth muri Australia.

Mu ntangiriro z'uku kwezi ubutegetsi bw'u Burundi bwemeje ko Bwana Barry Court aba uhagarariye inyungu zabwo w'icyubahiro i Perth nka 'Consul'

BBC yagerageje kuvugana n'abategetsi b'u Burundi kuri iki gikorwa muri Australia, kugeza ubu ntibirashoboka.

Mu byumweru bibiri bishize, Bwana Barry - usanzwe ari umucuruzi n'umushoramari - yaje i Burundi ayoboye itsinda ry'abashoramari bashaka gushora imari mu Burundi.

Gufungura ibiro by'uhagarariye u Burundi mu mujyi wa Perth uri mu burengerazuba bwa Australia byabaye ejo kuwa kabiri, nk'uko bitangazwa n'ikigo Victory Life Centre cyakiriye uyu muhango.

Ni umuhango wari witabiriwe na Madamu Denise Bucumi Nkurunziza umugore wa Perezida Petero Nkurunziza w'u Burundi.

Mme Nkurunziza yageze i Perth avuye i Cairo mu Misiri aho yabonanye na Madamu Intisar Al Sisi umugore wa Perezida Abdel Fattah el-Sisi.

Muri Australia habarirwa Abarundi bagera ku bihumbi bitatu, abenshi bahageze nk'impunzi.

Ibindi bisa n’ibi