Rayon Sports yo mu Rwanda ntishaka ko umukino wo kwishyura Al Hilal ubera muri Sudan

Rayon Sports Uwufise ububasha kw’isanamu Rayon Sports
Image caption Abakinnyi ba Rayon Sports bishimira igitego batsinze Al Hilal mbere y'uko iyi ikishyura nyuma y'iminota 6

Iyi nkuru yavuguruwe 16h55 ku isaha ya Kigali

Umuyobozi w'ikipe ya Rayon Sports avuga ko kubera impamvu z'umutekano mucye muri Sudan badashaka gushyira ikipe mu kaga bajya gukinirayo umukino wo kwishyura na Al Hilal.

Mu marushanwa y'amakipe yabaye aya mbere iwayo muri Afurika, mu mukino ubanza ku cyumweru gishize i Kigali, Rayon Sports yanganyije na Al Hilal yo muri Sudan igitego kimwe kuri kimwe.

Umukino wo kwishyura uteganyijwe mu byumweru bibiri.

Sadate Munyakazi umuyobozi wa Rayon Sports - imwe mu makipe afite abafana benshi mu Rwanda - yabwiye BBC ko ejo kuwa kabiri bandikiye ishyirahamwe ry'umupira w'amaguru mu Rwanda (FERWAFA) iby'iki kifuzo cyabo.

Agira ati:"impamvu ikomeye ni umutekano mucyeya ubarizwa muri kiriya gihugu[Sudani], kuko hari imyivumbagatanyo y'abaturage bahanganye n'inzego z'umutekano, tukaba tubona rero kujyanayo ikipe ari ibintu bishobora gushyira abakinnyi mu kaga".

Umunyamabanga mukuru wa FERWAFA yabwiye BBC ko bakiriye ibaruwa ya Rayon nyuma yo kuyigenzura bagashyikiriza icyifuzo cyayo impuzamashyirahamwe y'umupira w'amaguru muri Afurika, CAF.

Bwana Munyakazi avuga ko basabye ko uwo mukino bawushyira ahandi hantu baba bizeye umutekano.

Rayon yizeye gusezerera Al Hilal

Muri Sudani uruhande rw'abaturage bigaragambyaga n'uruhande rw'abasirikare bafashe ubutegetsi, mu cyumweru gishize bumvikanye gusangira ubutegetsi imyigaragambyo irahagarara.

Ku ngengabihe ya CAF, byanditse ko imikino yombi ya Rayon Sports na Al Hilal ubanza ubera i Kigali uwo kwishyura muri Sudan.

Umuyobozi wa Rayon Sports avuga ko batishimiye kunganya na Al Hilal i Kigali ariko bari kwitegura neza umukino wo kwishyura aho bizeye ko bazasezerera iyi kipe.

Yemeje kandi ko umutoza mukuru wa Rayon aheruka kubasezera abatunguye ariko ko mu masaha hagati ya 24 na 48 abakunzi b'iyi kipe bababwira umutoza mushya wayo.