Ikamyo y’ibitoro mu Rwanda yaguye irashya igeze kuri ‘station ya essence’

Impanuka y'ikamyo Uwufise ububasha kw’isanamu G.Karasira
Image caption Iyi kamyo yaguye maze irashya ubwo yari igeze imbere ya 'station ya essence'

Iyi nkuru yavuguruwe 11h15 ku isaha yo mu Rwanda

Ikamyo itwaye ibitoro yakoze impanuka ihita ishya mu gitondo cyo kuri uyu wa gatanu mu burengerazuba bw'u Rwanda, umuriro mwinshi watumye abahegereye bagira ubwoba nk'uko babivuga.

Gilbert Karasira utuye hafi y'aho iyi mpanuka yabereye mu murenge wa Kanjongo mu karere ka Nyamasheke yabwiye BBC ko yakanguwe n'induru y'abaturanyi bavugaga ko umuriro ubasatiriye.

Avuga ko ari ikamyo yari mu muhanga wa Karongi - Rusizi yerekeza nk'i Rusizi itwaye ibitoro ndetse byahise bimeneka hose mu muhanda no hanze yawo bigatera ikibatsi kinini.

Polisi mu Rwanda yaje kwemeza ko umuntu umwe wari utwaye iyi kamyo yahiriyemo agapfa.

Iyi kamyo yo mu Rwanda yahiriye muri metero nkeya uvuye kuri 'station ya essence', ubwoba bwari bwinshi ko nayo ishobora gufatwa nk'uko Karasira abivuga.

Umuyobozi w'umurenge wa Kanjongo Juvenal Cyimana yari yabwiye BBC mu gitondo ko iyi mpanuka y'ikamyo itwaye ibitoro nta muntu yahitanye.

Uwufise ububasha kw’isanamu Social Media
Image caption Umuriro wakurikiye aho ibitoro byamenetse hose

Bwana Cyimana avuga ko iyi mpanuka yabaye ahagana saa kumi n'imwe n'igice z'igitondo, ko nta kindi kintu cyafashwe n'umuriro uretse yo ubwayo.

Bwana Karasira avuga ko abaturage bagize ubwoba kubera umuriro mwinshi wakurikiraga aho ibitoro byamenetse hose batinya ko wafata n'ibindi bice bibegereye.

Avuga ko haje kubaho ubutabazi umuriro bakawuzimya.

Uwufise ububasha kw’isanamu Social Media
Image caption Abaturage batewe ubwoba n'umuriro mwinshi wakurikiye amavuta aho yamenetse

Ku mpanuka z'imodoka zitwaye ibitoro abaturage bagirwa inama yo kwirinda kujya kubiyora aho byametse kubera ko umuriro ushobora kubahita. Impanuka nk'izi zagiye zihitana benshi muri Afurika.

Muri Tanzania, kuwa gatandatu w'icyumweru gishize imodoka yikoreye ibitoro yaraguye birameneka, abaturage baje kubiyora ifatwa n'umuriro abarenga 70 bahasiga ubuzima.

Ibindi bisa n’ibi