Etienne Ndayiragije utoza Tanzania yasezereye igihugu cye cy’u Burundi

Etienne Ndayiragije utoza Tanzania yasezereye ikipe y'igihugu cye Uwufise ububasha kw’isanamu Goal
Image caption Etienne Ndayiragije utoza Tanzania yasezereye ikipe y'igihugu cye

Umunyezamu Juma Kaseja wa Taifa Stars yitwaye neza muri za penaliti nyuma y'uko amakipe yombi anganyije 1 -1 mu mukino wo kwishyura bituma Intamba mu Rugamba zisezererwa mu majonjora yo gushaka umwanya mu gikombe cy'isi cya 2022.

Amakipe yombi kuwa gatatu w'icyumweru gishize bari banganyije 1 - 1 i Bujumbura, mu mikino ibiri yanganyije ibitego 2 - 2. Yagombaga gukizwa na penaliti.

Kaseja yafashe penaliti ya Omar Ngando naho Saido Berahino na Gael Bigirimana bazitera hanze, biha umwanya Tanzania itozwa n'umurundi Etienne Ndayiragije wo gukomeza mu matsinda.

Ndayiragije atoza Tanzania by'agateganyo, ubusanzwe atoza ikipe ya KMC FC y'i Dar es Salaam, ni umutoza wakinnye mu ikipe ya Rayon Sports mu Rwanda wanatoje Vitalo' i Bujumbura.

Ni ubwa mbere uyu mutoza yari ahuye n'ikipe y'igihugu cye nk'umutoza.

Ubwo umukino wasatiraga za penaliti Intamba zasimbuje umunyezamu Jonathan Nahimana - usanzwe ubundi abanzamo imbere ya Juma Kaseja mu ikipe ya KMC - hajyamo Justin Ndikumana wa Bandari FC yo muri Kenya.

Uwufise ububasha kw’isanamu TFF
Image caption Juma Kaseja bagenzi be bamushyira hejuru kubera akazi yakoze

Mu mukino Tanzania yari yabanje gutsinda igitego cya Mbwana Samatta mu gice cya mbere, mbere y'uko iki gice kirangira Abdul Razak Fiston yakishyuye ku mupira mwiza yari ahawe na Amissi Mohammed.

Ethiopia yabonye umwanya wo gukomeza mu matsinda nyuma yo kunganya 1 -1 na Lesotho iri iwayo mugihe mu mukino ubanza bari banganyije 0 - 0, Ethiopia yakomeje kubera gutsindira igitego hanze.

Uwufise ububasha kw’isanamu TFF
Image caption Mbwana Samatta na Saido Berahino bayoboye amakipe yabo baramukanya

Muri iyi mikino, ejo kuwa kabiri Amavubi y'u Rwanda azakina na Seychelles mu mukino wo kwishyura i Kigali, umukino ubanza Amavubi yatsinze Seychelles 3 - 0 iwayo i Victoria.

Amakipe 28 yanyuma ku rutonde rwa FIFA ruheruka niyo ari gukina imikino y'ijonjora ry'ibanze, 14 muri yo azasanga 26 maze abe amakipe 40 azajya mu matsinda 10.

Amakipe atanu y'ibihugu niyo azahagararira umugabane wa Africa mu gikombe cy'isi cya 2022 muri Qatar.