Bakiriye bate u Rwanda kunyagira Seychelles 7 – 0 ?

Meddie Kagere yatsinze ibitego bibiri ahita agira bitatu mu 10 Amavubi yatsinze Seychelles Uwufise ububasha kw’isanamu FanClub Rwanda
Image caption Meddie Kagere yatsinze ibitego bibiri ahita agira bitatu mu 10 Amavubi yatsinze Seychelles

Ikipe y'u Rwanda Amavubi yatsinze ikipe ya Les Pirates ya Seychelles ibitego 10 ku busa mu mikino ibiri byabaye ibyishimo kuri bamwe, abandi ariko bavuga ko yatsinze ikipe yoroshye.

Amavubi ubu yabonye umwanya mu mikino yo mu matsinda 10 y'amakipe y'ibihugu bya Afurika azahatanira kujya mu gikombe cy'isi. Amakipe atanu yo muri Afurika niyo azajya mu gikombe cy'isi.

Ku mukino wo kwishyura i Kigali, Amavubi yatsinze ibitego birindwi ku busa, mu mukino ubanza i Victoria mu birwa bya Seychelles yari yahatsindiye ibitego bitatu ku busa.

Mu mukino w'ejo kuwa kabiri ibitego birindwi by'Amavubi byatsinzwe na Djihad Bizimana ku munota wa 18, Meddie Kagere 28, 50, Jacques Tuyisenge 29,35, Yannick Mukunzi, 56 na Muhadjiri Hakizimana ku munota wa 78.

Yatyaje imbori? Cyangwa ni 'ukwasa ikibonobono'?

Mu mikino 10 mpuzamahanga nyafurika u Rwanda ruheruka gukina rwatsinzemo itatu - harimo iyi ibiri na Seychelles - runganya itatu rutsindwa ine.

U Rwanda na Seychelles byari mu makipe y'ibihugu 28 ya Afurika ya nyuma ku rutonde rwa FIFA yakinaga imikino y'ijonjora ry'ibanze kugira ngo ibone umwanya mu matsinda.

Amavubi ari ku mwanya wa 133 ku rutonde rwa FIFA ruheruka, naho Seychelles ni iya 192, ikaba iya kane uvuye inyuma mu makipe yose muri Afurika imbere ya Djiboiti, Somalia na Eritrea ya nyuma.

Ni intsinzi yashimishije abakunzi b'Amavubi nk'uko babigaragaje ku mbuga nkoranyambaga, abandi bavuga ko bidatangaje kuko Seychelles ari ikipe n'ubusanzwe idakomeye.

Uwufise ububasha kw’isanamu Facebook
Uwufise ububasha kw’isanamu Facebook
Uwufise ububasha kw’isanamu Facebook
Uwufise ububasha kw’isanamu Facebook

Muri iyi mikino y'amajonjora y'ibanze Amavubi niyo yatsinze ibitego byinshi mu mikino ibiri, ibi byatumye kandi Meddie Kagere aba rutahizamu ufite ibitego byinshi (3) muri iyi mikino.

Intsinzi ya 7 - 0 siyo nini Amavubi abonye mu mukino mpuzamahanga kuko mu 2007 Amavubi yatsinze Djibouti ibitego 9 - 0.

Mu makipe 28 yakinaga iyi mikino y'amajonjora y'ibanze, ayabonye umwanya mu matsinda ni; Ethiopia,Tanzania, Equatorial Guinea, Liberia, Malawi, Zimbabwe, Djibouti, Mozambique, Angola, Togo, Guinea-Bissau, Sudan, Namibia n'u Rwanda.

Aya makipe azahuzwa n'andi 26 ya mbere muri Afurika abe 40, ashyirwe mu matsinda 10 azatoranywa mu gihe kiri imbere, imikino yo mu matsinda izatangira mu kwezi kwa gatatu 2020.

Uwufise ububasha kw’isanamu FunClub Rwanda
Image caption Minisitiri w'urubyiruko Rose Mary Mbabazi na minisitiri w'imikino Esperance Nyirasafari bishimira intsinzi y'Amavubi umukino urangiye