Ahmed Abiy ni nde? Maneko w’umusirikare wahawe igihembo cy'amahoro

Abiy ni umunyapolitiki wagaragaje ko amakimbirane agomba gushakirwa ibisubizo mu mahoro Uwufise ububasha kw’isanamu Getty Images
Image caption Abiy ni umunyapolitiki wagaragaje ko amakimbirane agomba gushakirwa ibisubizo mu mahoro

Amaze gutangazwa ko yegukanye iki gihembo cyitiriwe Nobel, Bwana Abiy yahamagawe kuri telephone n'abagize komite itanga iki gihembo kuko ubu ari mu gihugu cye.

Yagize ati: "Nishimiye cyane kumenya ayo makuru, murakoze cyane guha iki gihembo Afurika, Ethiopia nanjye, nizeye ko abategetsi ba Afurika bazabyakira neza bakarushaho kubaka amahoro ku mugabane wacu".

Abiy Ahmed ni umugabo wapfushije ababyeyi be bombi, nyina wo mu bwoko bw'aba Amhara yari umukiristu wo muri idini rya orthodox, naho se akaba umusilamu wo mu bwoko bw'aba Oromo.

Ni umwana wa 13 mu bana se yabyaye ku bagore be bane, akaba umuhererezi mu bana batandatu bavuka kuri nyina.

Yagiye mu gisirikare akiri muto, yarangije kaminuza mu ishami rya 'computer engineering' ari umusirikare.

Nyuma yaje kubona impamyabumenyi ya 'Master's mu bijyanye n'imiyoborere igamije impinduka yavanye muri kaminuza ya Greenwich i Londres.

Mu 2017 nibwo yarangije impamyabumenyi y'ikirenga PhD muri kaminuza ya Addis Ababa aho yakoze ku bijyanye no kurwanya ubuhezanguni.

Abiy afite umugore n'abakobwa batatu n'umuhungu wa kane baherutse kwakira nk'umwana wabo. Ni umukirisitu w'umupantekoti.

Abiy yinjiye mu gisirikare atarageza imyaka 20 mu 1991 kubera intambara zari mu gace k'iwabo zahitanye mukuru we, yaje kujya mu ngabo za Leta ya Ethiopia mu 1993 ashyirwa mu bakora iperereza.

Nyuma ya Jenoside mu 1995 yoherejwe i Kigali mu Rwanda mu ngabo za ONU zo kugarura amahoro bwitwaga MINUAR cyangwa UNAMIR.

Ingabo za MINUAR zoherejwe mu Rwanda kuva mu 1993 ubutumwa bwazo burangira mu 1996.

Mu ntambara hagati ya Eritrea na Ethiopia mu 1998 - 2000 yari ayoboye itsinda rya maneko zagombaga kumenya ahari ibirindiro by'ingabo za Eritrea.

Mu 2010 yavuye mu gisirikare afite ipeti rya Lieutenant Colonel yinjira muri politiki.

Yagiye afata imyanya itandukanyeya politiki aciye mu ishyaka ODP (Oromo Democratic Party), yabaye umudepite, ajya mu buyobozi bw'iri shyaka.

Muri politiki ye yigaragaje nk'umugabo ukunda amahoro kandi wanga akarengane mu bikorwa no mu mvugo ze, yamaganye ibikorwa binyuranye by'urugomo no gukoresha imbaraga.

Mu ntangiriro za 2018 yatorewe kuyobora ihuriro ry'amashyaka ryitwa EPRDF, imyivumbagatanyo yo mu kwezi kwa kabiri 2018 yatumye minisitiri w'Intebe Hailemariam Desalegn yegura.

Uwufise ububasha kw’isanamu WalTA TV
Image caption Mu kwezi kwa 10 2018 abasirikare baje ku biro bye bigaragambya basaba ko umushahara wabo wongerwa, yibonaniye nabo nawe abaha iki kizamini, bivugwa ko yumvikanye nabo mu mahoro n'ubucuti

Mu kwezi kwa kane uwo mwaka Inteko yahise imutorera kuba Minisitiri w'Intebe.

Ageze ku butegetsi yihatiye gushaka ibisubizo by'amakimbirane mu gihugu cye mu nzira z'amahoro.

Yihatiye kandi kunga Eritrea na Ethiopia, ibihugu by'ubutegetsi buzirana kuva mu myaka 50 yari ishize basinya amasezerano yiswe ay'ubucuti n'amahoro, ibihugu byombi n'ababituye bongera kubana.

Ibikorwa bye byatumye uyu munsi agenerwa igihembo cy'amahoro kitiriwe Nobel.