Rwanda: Amazi 100% gihugu cyose mu myaka 5, inzozi cyangwa impamo?

I Kigali bamwe baracyakora urugendo rurerure bajya kuvoma mu kabande kuko babuze amazi iwabo Uwufise ububasha kw’isanamu BBC GAHUZA
Image caption I Kigali bamwe baracyakora urugendo rurerure bajya kuvoma mu kabande kuko babuze amazi iwabo

Jean Claude Mwambutsa -BBC Gahuzamiryango i Kigali

Ikigo cy'igihugu gishinzwe iby'amazi mu Rwanda - WASAC- cyashimangiye intego ya leta y'u Rwanda ko mu 2024 buri munyarwanda azaba abona amazi meza ahoraho hafi ye, bamwe ibi babifata nk'inzozi zidashoboka.

Iyi ntego ivuga ko abayafite mu rugo batazongera kuyabura, naho abatayafite mu rugo bo mu cyaro bakayabona nibura kuri 500m, abo mu mijyi bakayabona kuri 200m uvuye iwabo.

Aimé Muzora uyobora ikigo WASAC yabwiye abanyamakuru ko ku bipimo nk'ibi ubu bageze kuri 62% mu gihugu cyose cyane cyane mu mijyi.

Mu gihugu kirimo abaturage miliyoni 12, WASAC ivuga ko ubu ifite abafatabuguzi bagera ku 200,000 bafite amazi mu ngo, abandi bakoresha amavomero rusange agera ku 40,000 hirya no hino mu gihugu.

Mu murwa mukuru ariko hari benshi bakigorwa no kubona amazi.

Mu gishanga kiri hagati ya Remera na Kanombe ku ntera ya kilometero imwe uvuye ku kibuga cy'indege cya Kigali twahasanze abaje kuhashaka amazi harimo bamwe bavuye muri kilometero umunani(8Km).

Aba bavuga ko batabona amazi meza mu buryo buhoraho ariyo mpamvu baje kuvoma aya yo mu gishanga.

Umusore wazanye amajerikani menshi ku igare ati: "Aya nyajyanye mu Busanza, naho arahaba ariko ni rimwe na rimwe, hashobora gushira icyumweru aya 'ma robine' ashinze mu ngo nta mazi aje".

Uwufise ububasha kw’isanamu BBC GAHUZA
Image caption Mu gishanga kiri hagati ya Remera na Kanombe baje kuvomayo kuko iwabo ntayahari

Ikibazo cy'ibura ry'amazi buri mwaka gikomera cyane mu bihe by'izuba ryinshi mu gihugu. Mu bihe nk'ibi by'imvura nabwo amazi arabura, abenshi bakagobokwa n'ay'imvura.

Aimé Muzora yavuze ko ubuke bw'amazi buterwa n'uko ahari agomba gusaranganywa n'abantu benshi biyongera buri munsi cyane cyane muri Kigali, avuga ko hari imishinga iriho yo kuyongera.

Ati: "Hari n'urundi ruganda ruri kubakwa ruzatanga metero kibe 40,000 ku munsi, ibihumbi mirongo itatu azoherezwa i Kigali naho ibihumbi 10 yoherezwe Bugesera.

"Bazashyiraho ishami rigana hariya hari ikibazo gikomeye mu bice bya Kanombe, Kabeza, Rubirizi, Busanza na Nyarugunga hari ikigega kinini bari kuhubaka. "

Uwufise ububasha kw’isanamu WASAC
Image caption Leta ivuga ko iri gushora miliyoni $200 mu mishinga yo kugeza amazi ku baturage bose, aha ni i Kigali ahari kubakwa ikigega gikwirakwiza amazi

Leta ivuga ko iri gushora miliyoni 200 z'amadorari mu kuvugurura imiyoboro ishaje igeza amazi ku baturage mu gihugu, no kubaka imishya.

Umwaka ushize bamwe mu badepite mu nteko ishinga amategeko batangaje ko intego yo kugeza amazi meza ku banyarwanda bose 100% mu myaka itanu ari nk'inzozi bakemanga ko zishoboka.

Mu kwezi kwa gatandatu uyu mwaka, Minisitiri w'ibikorwa remezo Claver Gatete yabwiye inteko ko yizeye neza ko mu 2020 mu mujyi wa Kigali hose ikibazo cy'amazi kizaba cyarakemutse.

Yagize ati: "Icyo gihe twese tuzaba duhari muzaduhamagara mumbaze niba ibyo bizaba byarabaye".