Pakistan: Abantu 73 bapfiriye mu muriro 'watewe na Gas' muri gariyamoshi

Gariyamoshi iri gushya Uwufise ububasha kw’isanamu Reuters

Abagenzi 73 bapfuye ubwo gariyamoshi yavaga mu mujyi wa Karachi yerekeza i Rawalpindi muri Pakistani yafatwaga n'inkongi.

Sheikh Rashid Ahmed, Minisitiri ushinzwe ingendo zo muri gariyamoshi, yavuze ko uwo muriro watewe n'iturika ry'umutemeri urimo gas wakoreshwaga n'abagenzi barimo bategura ifunguro rya mu gitondo.

Abategetsi bavuga ko uwo muriro wakwiragiye mu bice bitatu by'iyo gariyamoshi. Igice cya 11 cyarimo abagenzi 54, naho icya 12 n'icya 13 buri kimwe kirimo abagenzi 78.

Nkuko abategetsi bavuganye n'ibitangazamakuru byaho babivuga, benshi bapfuye ubwo bageragezaga gusimbuka iyo gariyamoshi yari irimo gushya.

Abandi 40 bakomeretse. Abategetsi bavuga ko umubare w'abapfuye ushobora kuza kwiyongera.

Image caption Gariyamoshi yari ivuye Karachi ijya Rawalpindi, urugendo rw'amasaha 25

Sheikh Rashid Ahmed yagize ati: "Amashyiga abiri yo gutekeraho yahiye. Barimo bateka, bari bafite amavuta yo guteka, yongereye ubukana umuriro".

Uwo minisitiri yongeyeho ko ari ikibazo gisanzweho cy'abagenzi bitwaza amashyiga mu ngendo ndende ngo baze guteka amafunguro.

Nubwo gutwara ibiryo by'impamba byemewe, ayo mashyiga yo ntiyemewe muri gariyamoshi.

Yavuze kandi ko abagenzi benshi bari barimo kwerekeza mu nama yateguwe n'umuryango w'abayisilamu b'aba Sunni wa Tablighi Jamaat.

Nyuma yaho mbere ingendo za gariyamoshi mu gihugu zari zabaye zihagaritswe, minisitiri ushinzwe ingendo za gariyamoshi yavuze ko ubu zongeye gusubukurwa.

Hari amakuru ava aho byabereye avuga ko ibibazo bijyanye n'umuriro w'amashanyarazi bishobora kuba ari byo byateje iyo mpanuka.

Abenshi mu barokotse bavuze ko ibibazo mu nsinga z'amashanyarazi (short-circuit) muri iyo gariyamoshi ari byo bishobora kuba byateye iyo mpanuka.

Uwufise ububasha kw’isanamu RESCUE1122

Umukuru wungirije wa polisi Jamil Ahmed yavuze ko bamwe mu bapfuye badashobora kumenyekana abo ari bo kuko bahiye bagakongoka.

Yavuze ko hazakenerwa gukorwa ibizamini bya 'DNA' ngo hamenyekane umwirondoro w'abapfuye.

Ku rubuga rwa Twitter, Minisitiri w'intebe Imran Khan yavuze ko "ababajwe cyane n'aya mahano mabi cyane", yongeraho ko yategetse ko hakorwa "iperereza aka kanya".

Iyo mpanuka yabereye hafi y'umujyi wa Rahim Yar Khan mu majyepfo y'intara ya Punjab.

Uwufise ububasha kw’isanamu RESCUE1122

Gariyamoshi ikora ingendo ziva i Karachi , ikajya no muri byinshi mu bice bya Pakistani no mu mujyi wa Rawalpindi, ni iya kompanyi Tezgam.

Ni imwe mu zimaze igihe kinini kandi zizwi cyane muri za kompanyi za gariyamoshi zo muri iki gihugu.

Ikora ingendo za buri munsi kandi urwo rugendo rumara amasaha 25 n'igice.

Pakistani ifite amateka y'impanuka za gariyamoshi zigwamo abantu benshi. Abagwa muri izo mpanuka bakunze kuba ari benshi kuko gariyamoshi zitwara abagenzi benshi baruta umubare zagenewe gutwara.

Uwufise ububasha kw’isanamu AFP/GETTY

Mu kwezi kwa karindwi, abantu 11 bapfiriye mu mpanuka, abandi bane na bo bapfira mu mpanuka mu kwezi kwa cyenda.

Mu mwaka wa 2007, abantu 56 bapfiriye mu mpanuka abandi barenga 120 barakomereka hafi y'umujyi wa Mehrabpur.

No mu mwaka wa 2005, abantu barenga 130 barapfuye ubwo gariyamoshi eshatu zagonganaga mu ntara ya Sindh, iyo ikaba ari imwe mu mpanuka mbi cyane za gariyamoshi mu mateka y'iki gihugu.