Burundi: Urukiko rwategetse ko ba banyamakuru bakomeza gufungwa

Hejuru uhereye ibumoso; Térence Mpozenzi, Agnès Ndirubusa, Egide Harerimana. Hasi: Christine Kamikazi n'umushoferi wabo Adolphe Masabarakiza barakomeza gufungwa Uwufise ububasha kw’isanamu Iwacu
Image caption Hejuru uhereye ibumoso; Térence Mpozenzi, Agnès Ndirubusa, Egide Harerimana. Hasi: Christine Kamikazi n'umushoferi wabo Adolphe Masabarakiza barakomeza gufungwa

Urukiko rukuru rwa Bubanza mu majyaruguru y'u Burundi rwategetse ko abanyamakuru bane b'ikinyamakuru Iwacu bakomeza gufungwa.

Nyuma yo kumvwa n'urukiko ku wa kabiri bari kumwe n'abunganizi babo, urukiko rwari rwavuze ko rutanga umwanzuro ku gufungwa cyangwa gufungurwa by'agateganyo mu masaha 48.

Térence Mpozenzi, Agnès Ndirubusa, Egide Harerimana, Christine Kamikazi n'umushoferi wabo Adolphe Masabarakiza barashinjwa "ubufatanyacyaha mu guhungabanya umutekano w'igihugu".

Ku wa kabiri w'icyumweru cyashize bafashwe bagiye gutara inkuru ku mirwano yari ishyamiranyije ingabo za leta n'inyeshyamba zari zateye mu majyaruguru y'uburengerazuba bw'u Burundi.

Uyu munsi byari byitezwe n'abakoresha babo ko urukiko rushobora kubarekura, kuko bo bahamya ko nta kidasanzwe bafashwe bari gukora uretse umwuga wabo.

Umuyobozi w'iki kinyamakuru yanditse kuri Twitter ko "ari agahinda gutangaza ko urukiko rwemeje ko abavandimwe bacu bakomeza gufungwa".

Yavuze ko iki kinyamakuru kizajurira.