Mario Balotelli yeretse abafana umujinya kubera irondaruhu bariho bamukorera

Yafashe umupira awubateramo kubera ibyo bariho bamukorera Uwufise ububasha kw’isanamu PA Media
Image caption Yafashe umupira awubateramo kubera ibyo bariho bamukorera

Mario Balotelli rutahizamu w'ikipe ya Brescia yafashe umupira n'umujinya mwinshi awutera mu bafana maze ahita ava mu kibuga kubera uburyo abafana b'ikipe ya Hellas Verona bariho bamuvugiriza urwamo bishingiye ku irondaruhu.

Umukino wahagaze, bagenzi be n'abasifuzi bagerageza kumwihanganisha ngo agaruke mu kibuga.

Balotelli yanditse kuri Instagram ati: "Abantu bari hariya baririmba nk'inkende. Mwikojeje isoni".

Uyu musore wahoze akina mu ikipe ya Manchester City na Liverpool yashyizeho n'amashusho y'aba bantu baririmbaga izo ndirimbo.

Yongeyeho ati: "Imbere y'abana banyu, abagore banyu, bene wanyu, ababyeyi n'inshuti zanyu…muteye isoni.

Ndashimira bagenzi banjye mu kibuga no hanze yacyo kwifatanya nanjye, n'ubutumwa bwose nakiriye buva mu bafana".

Babashije kumwinginga aguma mu kibuga, umusifuzi Maurizio Mariani yategetse ko hakoreshwa itegeko rirwanya irondaruhu.

Hahise hatangwa itangazo muri stade ko nibikomeza umukino uhagarikwa.

Balotelli yakomeje umukino ndetse atsinda igitego ku munota wa 85 nubwo ikipe ye itabashije kubona ikindi ngo nibura inganye uyu mukino.

Uwufise ububasha kw’isanamu PA Media
Image caption Bamwihanganishije yemera kuguma mu kibuga aza no gutsinda igitego

Mu Butaliyani irondaruhu riracyigaragaza cyane mu mikino ku bibuga bimwe na bimwe.

Bamwe mu bategetsi b'ikipe ya Verona batangaje amagambo agabanyiriza ubukana ibyakozwe n'abafana.

Bamwe bananenze igikorwa cya Balotelli cyo gutera umupira mu bafana. Nubwo hari abavuze ko ibyo yakoze ntaho bihuriye mu bubi n'ibyo yakorewe.

Mu 2013 Mario Balotelli yavuze ko atazaguma mu kibuga niyongera gukorerwa ibikorwa by'irondaruhu ari gukina, icyo gihe we na bagenzi be muri AC Milan baribasirwaga.

Mu 2018, mu gihe yakinaga mu ikipe ya Nice, Mario yahawe ikarita y'umuhondo kubera kwiyama abafana ba Dijon bamuvugirizaga induru.

Mugenzi we Romelu Lukaku wa Inter Milan amaze igihe yibasirwa n'ibikorwa nk'ibi ku bibuga mu Butaliyani.

Mario Balotelli w'imyaka 29, ni umutaliyani wavukiye i Palermo ku bimukira bavuye muri Ghana, yakiniye ikipe y'igihugu kuva mu 2010.