Burundi: Imibare mishya ya OMS ivuga ko malaria yongeye kuzamuka

Burundi Uwufise ububasha kw’isanamu Google

Imibare mishya y'icyumweru cya 44 cy'uyu mwaka (28/10 na 03/11/2019) y'ishami ryita ku buzima ku isi, OMS, igaragaza ko abarwaye malaria biyongereye mu Burundi bakagera kuri miliyoni zirenga zirindwi.

Ku bireba umugabane wa Afurika, OMS ishami rya Afurika, ivuga ko iri gukurikirana ibyorezo n'ibindi bibangamiye ubuzima byo kwitabawaho cyane bigera kuri 68.

Ivuga ko iri kwibanda cyane ku ndwara y'iseru muri Lesotho, Hepatitis E muri Namibia, umutekano mucye uri gutera ubuhunzi no gushyira ubuzima bw'abantu mu kaga muri Mali n'icyorezo cya Ebola muri DR Congo.

OMS iravuga ko kuva mu kwezi kwa mbere uyu mwaka kugeza tariki 29 z'ukwezi kwa cyenda abantu miliyoni 7,233,138 barwaye malaria mu Burundi, iyi ndwara ikaba yarishe 2,691.

OMS ivuga ubu ko mu cyumweru cya tariki 23 - 29/09/2019 habaruwe abantu 121,704 basanzemo malaria na 32 yishe.

Iri shami rya ONU rivuga ko imibare ya malaria mu Burundi yazamutse ku kigero cya 49% mu cyumweru cya 39 cy'uyu mwaka ugereranyije n'icyo cyumweru cya 2018.

Mu kwezi kwa munani, imibare yatanzwe na OMS y'abo basanzemo malaria yari abantu barenga miliyoni eshanu kandi yishemo 1,800, ubutegetsi bwo bwatangaje ko ari miliyoni 4,3 kandi yishe 1,400.

Icyo gihe, mu kiganiro n'abanyamakuru Minisitiri w'ubuzima Dr Thaddée Ndikumana yavuze ko malaria mu Burundi atari icyorezo agereranyije na 2017 ubwo ubutegetsi bwemeje ko yabaye icyorezo.

OMS yo yavugaga ko iyi mibare yo mu kwezi kwa munani uyu mwaka irenze ikigero cy'uko indwara yitwa icyorezo.

Ubutegetsi bw'u Burundi ntacyo buratangaza ku mugaragaro ku mibare mishya ya OMS.

Uwufise ububasha kw’isanamu OMS
Image caption Ishusho y'icyumweru cya 44 cya 2019 ku ndwara n'ibibangamiye ubuzima bw'abantu OMS-Africa ivuga ko iri gukurikirana

Muri aka karere, mu zindi ndwara n'ibyugarije ubuzima bw'abantu OMS ivuga iri gukurikirana biri ku rwego rudakabije (ungraded).

Ivuga indwara ya 'Dengue fever' imaze kurwarwa n'abantu 6917 muri Tanzania kuva uyu mwaka watangira, ikaba ntawe irica.

Iseru imaze gupimwa abantu 1,584 bakayisangamo 795 ikica batanu (5) muri Uganda.

Hagati y'ukwezi kwa gatandatu n'ukwa karindwi 2019, iseru yasuzumwe abantu 74 mu Rwanda bayisangamo 12 yica abagera kuri bane (4) mu burengerazuba cyane mu karere ka Ngororero nk'uko OMS ibivuga.