Rwanda: Uko uwanduye SIDA yakiriye iby’urushinge rwasimbura ibinini afata buri munsi

urushinge Uwufise ububasha kw’isanamu Getty Images

Mugemana Jean Bosco avuga ko gufata ibinini bigabanya ubukana bwa SIDA buri munsi ari ibintu bigoye, yishimiye kumva ko mu Rwanda hari kugeragezwa uburyo bw'urushinge rwafatwa rimwe mu byumweru umunani aho gufata ibi binini.

Dr Sabin Nsanzimana uyobora ikigo cya Rwanda Biomedical Center gishinzwe ubuzima yabwiye BBC ko igeragezwa ry'ubu buryo bw'inshinge rimaze umwaka rikorwa kandi rigeze ku cyiciro cya nyuma.

Bwana Nsanzimana avuga ko ubu ari uburyo bushya buri mu bushakashatsi bwo kuvura indwara zimara igihe (chronicle diseases) ku bantu bafata imiti yazo igihe kirekire.

Ati: "Hashize igihe kirenga umwaka igeragezwa, hari imiti ibiri yamaze gushyirwa mu rushinge yitwa Cabotegravir na Rilpivirine".

Bwana Mugemana - ubana n'ubwandu bwa SIDA - kuva mu 2012 amenye ko yanduye buri munsi afata ibinini bizwi nka ARV bigabanya ubukana bwa SIDA, avuga ko ari ibintu bigoye kandi binagira ingaruka.

Ati: "Nashimishijwe no kumva iyo nkuru y'urushinge rwasimbura iyi miti ya buri minsi. Igisigaye ubu ndi kwibaza ni igihe izo nshinge zizabonekera".

Dr Nsanzimana yabwiye BBC ko batazi igihe runaka ubu buryo buzagezwa ku isoko. Ati: "Ariko iyo abantu babivuze gutya biba byageze ku cyiciro cya kane cy'ubushakashatsi, igikurikiraho ni ukujya ku isoko".

"Mu yindi miti imeze gutyo iyo bigeze kuri iki cyiciro cya kane ntibyarenzaga imyaka ibiri cyangwa itatu [idashyizwe ku isoko]".

Mu nama mpuzamahanga ya 10 yitwa "AIDS Society Conference on HIV Science" yabaye mu kwa karindwi muri Mexique, ikigo gikora imiti cyo muri Amerika kitwa ViiV Healthcare cyatangaje ko kiri gukora ubu bushakashatsi kandi bugeze ku cyiciro cya gatatu.

Dr Nsanzimana avuga ko amakuru arambuye kuri ubu bushakashatsi azatangirwa mu nama mpuzamahanga kuri SIDA n'izindi ndwara z'ibyorezo izabera mu Rwada mu cyumweru gitaha.

SIDA mu Rwanda ihaze ite?

Raporo y'ubushakashatsi yerekanywe mu kwezi gushize y'ikigo cya leta gishinzwe ubuzima ivuga ko ubwandu bwa SIDA mu gihugu buhagaze kuri 3% y'abaturage bose.

Dr Nsanzimana avuga ko muri ubu bushakashatsi basanze 80% by'Abanyarwanda bafite SIDA baripimishije. Ati: "Ni wo mubare wa mbere twabonye, twifuzaga kugera kuri 90% muri 2020".

Avuga ko undi mubare babonye ari uko abafata imiti igabanya ubukana mu banduye ubu ari 94%.

Dr Nsanzimana avuga ko inama mpuzamahanga iteganyijwe i Kigali mu cyumweru gitaha izahuriramo abantu bari hagati y'ibihumbi birindwi n'ibihumbi 10 bavuye mu bihugu 150.

Ati: "Ntabwo iyo nama izavuga kuri SIDA gusa, izavuga no ku gituntu, malaria na Ebola n'ibindi byorezo byugarije aka karere kagaragaramo indwara nyinshi".

Ibindi bisa n’ibi