Rwanda: Impushya zo kubaka, gutwara ibinyabiziga no gufungurwa... 'ahiganje ruswa'

Ruswa Uwufise ububasha kw’isanamu AFP

Umuryango wa Transparency International ishami ry'u Rwanda uyu munsi watangaje ubushakashatsi bwawo ku buryo ruswa ihagaze mu Rwanda, mu babajijwe abantu 18,5% bavuga ko basabwe cyangwa bifuje gutanga ruswa mu mezi 12 ashize.

Ubu bushakashatsi bwa 10 bw'uyu muryango utegamiye kuri leta buvuga ko ahantu ubu higanje cyane ruswa ari mu mashuri y'imyuga n'ubumenyingiro.

Aya mashuri muri iki gihe ajyamo urubyiruko rwinshi mu Rwanda, hano ruswa yazamutse ku kigero cya 12,8% muri uyu mwaka ivuye kuri 7,14% umwaka ushize, nkuko ubwo bushakashatsi bubivuga.

Polisi yo mu muhanda iza ku mwanya wa kabiri mu nzego zivugwamo ruswa muri ubu bushakashatsi, aho iri ku kigero cya 12,4%, muri serivisi yayo yo gutanga impushya zo gutwara ibinyabiziga iri ku kigero cya 27%.

Urwego rw'abikorera ruza ku mwanya wa gatatu, naho urwego rw'ubugenzacyaha RIB rukaza ku mwanya wa kane aho muri serivisi yo gufungura abantu havugwa ruswa ku kigero cya 25,8%.

Ruswa muri RIB yavuye ku kigero cya 6% ubwo yari ikitwa CID igera ku 8,5% nkuko byavuzwe n'umuyobozi wa Transparency International Rwanda yerekana ubu bushakashatsi.

Inzego zikurikiraho muri ruswa ni abacamanza, inzego z'ubutegetsi bw'ibanze, ikigo gitanga amazi WASAC, igitanga amashanyarazi REG n'igishinzwe ubugenzuzi bw'imirimo imwe n'imwe, RURA.

Serivisi zivugwamo ruswa nyinshi ni; ukubona uruhushya rwo kubaka (33%), uruhushya rwo gutwara ibinyabiziga (27%), gufungura abafunze(25%), kubabarirwa kudakoresha imashini itanga iyemezabwishyu ya EBM(25%).

Ubu bushakashatsi bugaragaza ko ikigereranyo (hagati y'inyinshi n'intoya) cya ruswa itangwa ari 85,030Frw, mu mwaka ushize yari 58.065Frw, mu 2017 yari 36.173Frw naho mu 2016 yari 43.743Frw.

Umuyobozi w'ishami ry'ibijyanye na ruswa muri Transparency International Rwanda, Albert Kavatiri, yavuze ko muri rusange ruswa mu Rwanda itari hejuru cyane kuko 78.5% by'ababajijwe bavuze ko ruswa mu Rwanda iri hasi.

Transparency International Rwanda isaba inzego zo gukurikirana ibyaha hamwe n'abacamanza kongera umuhate kuko bigaragara ko ruswa yazamutse muri izi nzego.

Ibindi bisa n’ibi