Rwanda: Ibiciro by’amashanyarazi byazamutse, bigabanurwa ku bitaro

Amatara y'amashanyarazi Uwufise ububasha kw’isanamu Getty Images
Image caption Ibi biciro byaherukaga gusubirwamo mu kwezi kwa munani 2018

Ikigo cy'u Rwanda gishinzwe ingufu cyatangaje ko ibiciro by'amashanyarazi byahindutse kugira ngo haboneke ubushobozi mu gutunganya no kuyongera.

Ibiciro bishya muri rusange byazamutse, bigabanywa gusa ku bigo bitanga serivisi z'ubuzima, gusa ntibyahindutse ku ngo zikoresha umuriro mucye, munsi ya kilowatt 15 ku kwezi.

Ku ngo z'abantu, abakoresha munsi ya kilowatt 15 ku kwezi bazakomeza kwishyura amafaranga 89 kuri kilowatt imwe.

Abakoresha hagati ya kilowatt 15 na 50 ku kwezi ubu bazajya bishyura 212 kuri kilowatt imwe aho kwishyura 182Frw kuri imwe.

Hejuru ya kilowatt 50 igiciro cyavuye kuri 210Frw/kWh gishyirwa kuri 249Frw.

Ibi biciro byaherukaga gusubirwamo mu kwezi kwa munani 2018.

Marie Claire Mugorucyeye ukora ubucuruzi buciriritse utuye mu murenge wa Gisozi mu mujyi wa Kigali yabwiye BBC ko yatunguwe no kumva ko ibiciro by'amashanyarazi byazamutse mu gihe gito.

Ati: "Njyewe nkoresha umuriro w'ibihumbi bitanu ukamara ukwezi (ni kilowatt 27) narebye ibiciro bishya mbona ngomba kongeraho igihumbi, kandi ibyo nkora ntabwo biri kugenda neza.

"Biransaba guhindura igihe nacanaga amatara no gutera ipasi kugirango nirinde uwo mutwaro wiyongereye ku buzima bwo mu rugo".

Mu kiganiro n'abanyamakuru ejo kuwa kabiri, Ron Weiss umuyobozi w'ikigo cya Leta REG gishinzwe amashanyarazi yavuze ko kuzamura ibiciro byatewe no guhenda kwo kuyatunganya no kuyagura.

Leta y'u Rwanda irakora ariko ikagura amashanyarazi na bamwe mu bigenga bashoye imari mu gukora amashanyarazi nk'ikigo cy'abanyamerika kiyavana muri gazi methane mu kiyaga cya Kivu.

Bwana Weiss avuga kandi ko bigamije no kongera ibikorwa byo kuyageza kuri benshi no kuyabungabunga.

Uwufise ububasha kw’isanamu Getty Images
Image caption Aho bavana gaz methane mu kiyaga cya Kivu igakorwamo ingufu z'amashanyarazi

Mu biciro bishya, hoteli zizajya zigura kilowatt imwe amafaranga 157 aho kuba 126 zatangaga.

Inganda nto zizajya zigura kilowatt imwe amafaranga 134 aho kuba 110. Inini igiciro cyavuye kuri 80Frw/kWh kigera kuri 94/kWh.

Ibigo bitanga serivisi z'ubuzima nk'ibitaro na za centre de sante byagabanyirijwe ibiciro biva kuri 192Frw/kWh bishyirwa kuri 186Frw/kWh.

Ibi biciro bishya bizatangira gukurikizwa tariki 21 z'uku kwezi nk'uko bivugwa n'ikigo gishinzwe imirimo imwe n'imwe ifitiye igihugu akamaro, RURA.

U Rwanda ubu rutunganya Megawatt 224 amashanyarazi, muri yo 39% ava ku ngufu z'amazi, 29% muri gazi methane, 11% agurwa mu mahanga, andi akava ku zindi ngufu nk'uko bivugwa n'ikigo REG.

Imibare ya 2019 y'umushinga Power Africa ivuga ko amashanyarazi mu Rwanda amaze kugera kuri 30% by'ingo mu gihugu, intego ikaba ari uko bagera kuri 52% mu 2024.

Imibare yo mu kwa 12/2019 ya REG ivuga ko amashanyarazi amaze kugera kuri 52% by'ingo mu gihugu,harimo 38% bayakura ku muyoboro rusange usanzwe na 14% bayakura cyane cyane ku ngufu z'izuba.

Ibindi bisa n’ibi