Coronavirus: 'Turirinze cyane aho turi' – Umunyarwandakazi wiga mu Bushinwa

Abantu mu Bushinwa basabwa kwambara udukoresho dupfuka umunwa n'amazuru mu rwego rwo kwirinda kwanduzanya

Ahavuye isanamu, Getty Images

Insiguro y'isanamu,

Abantu mu Bushinwa basabwa kwambara udukoresho dupfuka umunwa n'amazuru mu rwego rwo kwirinda kwanduzanya

Leta y'u Rwanda yasohoye itangazo rigira inama Abanyarwanda kwirinda ingendo zitari ngombwa mu ntara ya Hubei ahari umujyi wa Wuhan ufatwa nk'izingiro ry'iyi virus yo mu bwoko bwa Corona.

Abashinzwe ubuzima mu Rwanda batangaje ko batangiye ibikorwa byo kugenzura abagenzi ku kibuga cy'indege cya Kigali mu rwego rwo kwirinda iyi virus yateye.

Gisèle Berwa, Umunyarwandakazi wiga mu majyepfo y'Ubushinwa mu ntara ya Guangdong - kuri 1,000Km uvuye mu ntara ya Hubei - yabwiye BBC uko byifashe aho ari mu gihe iyi ndwara iri kuvugwa cyane.

Umubare nyawo w'Abanyarwanda baba mu Bushinwa ntabwo uzwi neza, gusa ubucuruzi n'abajya kwiga mu Bushinwa bavuye mu Rwanda byarushijeho kwiyongera mu myaka ya vuba ishize.

Mu kwezi kwa gatandatu, RwandAir yatangije ingendo (gatatu mu cyumweru) i Guangzhou, gusa muri iyi minsi zimwe muri izi ngendo zarasubitswe nk'uko bigaragara ku rubuga rw'iyi kompanyi ya leta y'u Rwanda.

Mu mwaka ushize gusa, Abanyarwanda 400 bagiye mu Bushinwa mu masomo y'igihe gito nk'uko byatangajwe na ambasaderi w'Ubushinwa mu Rwanda mu mpera y'umwaka ushize.

Impungenge ku baturage b'ibindi bihugu baba mu Bushinwa zakomeje kwiyongera mu gihe iyi virus ikomeje gukwirakwira, abamaze kuyibonwaho barenga 6,000 mu gihe imaze kwica 132.

Abaturage b'ibindi bihugu bari mu Bushinwa, cyane mu gice cyegereye intara ya Hubei ahari umujyi wa Wuhan, bari kugerageza kuva muri iki gihugu.

Leta z'ibihugu nka Amerika, Ubuyapani, Australia n'ibihugu by'i Burayi biri gucyura abaturage babyo babishaka bari muri ako gace n'ahandi mu Bushinwa.

Byifashe bite mu Bushinwa?

Gisèle Berwa, avuga ko aho aba mu mujyi wa Shenzhen abantu bose babasaba kwambara udukoresho dupfuka umunwa n'amazuru, kwirinda kujya ahari abantu benshi no kwitwararika isuku.

Avuga ko leta y'Ubushinwa yagabanyije ingendo z'abantu, ikanabagira inama zo kuguma mu ngo zabo birinda kujya ahari abantu benshi.

Ati: "Leta yashyize imbaraga nyinshi mu kurwanya iyi ndwara, ubu ushobora kuva ahantu hamwe ujya ahandi bakagupima kenshi cyane mu nzira.

"Aho ndi ntabwo biteye ubwoba cyane kereka ahari abantu benshi ni ho biba biteye ubwoba.

"Impungenge zindi ziriho ubu ni abashaka gutaha kuko ntabwo uba uzi neza ko mu nzira utaha ujya ku kibuga cy'indege utahagera wamaze guhura n'uyifite".

Ibiruhuko by'igihe kitazwi

Iyi virus yateye mu gihe Ubushinwa bwari bwinjiye mu biruhuko byo gusoza umwaka, ni igihe Abashinwa benshi - mu muco wabo - bajya aho bakomoka gusorezayo umwaka.

Berwa ati: "Kuko byabaye abantu bari mu biruhuko rero, amashuri yahise atanga amatangazo anamenyesha abanyeshuri ko itariki yo gutangira yigijweyo kugera igihe kitazwi".

Hari impungenge zuko iki gihe gishobora kuba kirekire kuko iyi virus itarabonerwa umuti kandi abayanduye bakomeza kuboneka mu Bushinwa.

Berwa ati: "Ubu uwataha ntazi ngo ndakatisha [ticket y'indege] izagaruka ryari, uri aha nawe ntazi ngo ahari mu gihe kinganga iki? Ni ibyo bibazo bihari urebye".

Berwa avuga ko muri iki gice cy'amajyepfo y'Ubushinwa hari umubare utari muto w'Abanyarwanda ariko ko agereranyije nka 60% y'abakora ubucuruzi bari baratashye, ariko 90% y'abaje kwiga bo bagihari.

Ati: "Nk'abakora ubucuruzi abenshi bari baratashye kubera ibyo biruhuko, abandi baracyahari ariko ubu ntibari kugenda cyane kubera kwanga kugera ahari abantu benshi, turirinze cyane aho turi".

Ambasade y'u Rwanda mu Bushinwa yatangaje ku rubuga rwa Twitter ko "iri gukurikiranira hafi cyane uko ibintu byifashe kugira ngo Abanyarwanda birinde hagendewe ku nama zitangwa na leta y'Ubushinwa".

Kugeza ubu, abaturage b'ibindi bihugu bari mu Bushinwa abenshi bifuza kuhava, bimwe mu bihugu byabo biri kubafasha gutaha.

Kompanyi zitandukanye z'indege zasubitse zimwe mu ngendo zazo zajyaga mu Bushinwa by'umwihariko mu mujyi wa Wuhan.

Mu gihe indege ya RwandAir yajyaga i Guangzhou gatatu mu cyumweru, ku ngengabihe ya RwandAir igaragara ku rubuga rw'iyi kompanyi muri iki cyumweru hariho urugendo rumwe rwo ku wa gatandatu.