Coronavirus: Muri Uganda abantu 100 barimo Abashinwa 44 bashyizwe mu kato

Minisitiri w'ubuzima wa Uganda ejo kuwa gatatu mu kiganiro n'abanyamakuru

Ahavuye isanamu, Edge

Insiguro y'isanamu,

Minisitiri w'ubuzima wa Uganda ejo kuwa gatatu mu kiganiro n'abanyamakuru

Minisiteri y'ubuzima ya Uganda yatangaje ko abantu barenga 100 bageze ku kibuga cy'indege mpuzamahanga cya Entebbe bavuye mu Bushinwa bashyizwe mu kato mu gihe cy'iminsi 14.

Ibi bigamije kwirinda ikwirakwira rya virus yo mu bwoko bwa Corona nk'uko iyi minisiteri ibitangaza.

Kugeza ubu iyi virus nta muntu urayibonwaho ku mugabane wa Afurika.

Minisitiri w'ubuzima wa Uganda Dr Jane Aceng yabwiye abanyamakuru ejo kuwa gatatu ko 44 muri aba bantu bashyizwe mu kato ari Abashinwa.

Yavuze ko minisiteri y'ubuzima kugeza ubu nta makuru ifite ko haba hari umuturage wa Uganda wanduye cyangwa ukekwaho iyi virus.

Iyi virus yo mu bwoko bw'izitwa corona ibimenyetso byayo bishobora kugaragara mu gihe cy'iminsi 14 umuntu ayanduye.

Imibare yatangajwe ejo kuwa gatatu nimugoroba na komisiyo y'Ubushinwa ishinzwe ubuzima ni uko abamaze kwandura iyi virus mu Bushinwa bamaze kuba 28,018 naho 563 yarabishe.

Imibare yatanzwe n'iyi komisiyo mu gitondo cyo kuri uyu wa kane ni uko ubwandu bushya 3,694 n'abo yishe 73 bamenyekanye ejo kuwa gatatu.

Aho iyi virus imaze kugera hanze y'Ubushinwa:

Leta ya Uganda ivuga ko yongereye ibikorwa byo gusuzuma abantu ku kibuga cy'indege, kandi bikaba itegeko ku bavuye mu Bushinwa gutanga amakuru y'uko bagiye bisuzumisha.

Leta ya Uganda ivuga ko hari abanyeshuri amagana b'abanya-Uganda biga mu burasirazuba bw'Ubushinwa ariko kugeza ubu ko nta mugambi uhari wo kubacyura.

Ibihugu byinshi ku isi bikomeje guhangayikishwa n'iyi virus no gufata ingamba ngo itinjira iwabo cyangwa idakwirakwira aho imaze kugera.