Tour du Rwanda 2020: Yevgeniy Fedorov wo muri Kazakistan niwe wegukanye agace ka mbere

Yevgeniy Fedorov wo muri Kazakistan niwe wegukanye agace ka mbere Uwufise ububasha kw’isanamu BBC GAHUZA
Image caption Yevgeniy Fedorov wo muri Kazakistan niwe wegukanye agace ka mbere muri Tour du Rwanda 2020

Yevgeniy Fedorov, umunya Kazakistan niwe wegukanye agace ka mbere kisiganwa mpuzamahanga rya Tour du Rwanda 2020.

Uyu musore w'imyaka 20 ukinira Vino-Astana Motors yo mu gihugu cya Kazakistan yakoresheje amasaha 2 iminota 44 n'amasegonda 59 gusiganwa ahareshya na kilometero 114.

Yakurikiwe n'umunya Eritrea, Mulueberhan Henok ukinira ikipe y'igihugu ya Eritrea hagati yabo harimo intera y'amasegonda 15.

Abasiganwa bahagurutse i kigali berekeza i Rwamagana mu Burasirazuba, hanyuma bagaruka i Kigali.

Umunyarwanda waje hafi ni Byukusenge Patrick wa Benediction Ignite uri ku mwanya wa gatanu.

Muri iri rushanwa,utsinze agace karyo yegukana amadorali 1200. Amakipe 16 niyo ari guhatana mu iri rushanwa rya Tour du Rwanda. Amakipe menshi ni aturuka ku mugabane w'i burayi.

Harimo amakipe nka Israel Start up Nation, Total Direct Energy yo mu bufaransa na Team Novo Nordisk yo muri Amerika mu makipe afite abakinnyi bakomeye bahabwa amahirwe yo kuba bakwegukana irushanwa ry uyu mwaka.

Uwufise ububasha kw’isanamu BBC GAHUZA
Image caption Abasiganwa bahagurutse i kigali berekeza i Rwamagana mu Burasirazuba, hanyuma bagaruka i Kigali.

Ni inshuro ya kabiri iri siganwa rigiye kuba riri ku cyiciro cya 2.1 nyuma y'iry'umwaka ushize ryegukanwe n'Umunya-Erythrée Merhawi Kudus wa Astana, ariko akaba atazarikina uyu mwaka.

Tour du Rwanda yatangiye gukinwa mu 1988, yabaye mpuzamahanga kuva mu 2009, aho yashyizwe ku cyiciro cya 2.2 kugeza mu 2018.

Itandukaniro ry'ibi byiciro byombi riba ko mu isiganwa riri kuri 2.1, amakipe yemerewe gutumirwamo arimo ayo mu cyiciro cya mbere 'World Tour' atarenze 50% y'amakipe yose agize isiganwa, n'amakipe yo mu cyiciro cya kabiri 'Pro-Continental teams'.

Naho isiganwa riri ku cyiciro cya 2.2 ryo amakipe yemerewe gutumirwa ni ayo mu kiciro cya gatatu gusa bita 'Continental teams' n'amakipe y'ibihugu yo ku mugabane irushanwa ryabereyeho.

Ibindi bisa n’ibi