Coronavirus muri Kenya: Umuntu wa mbere bayisanzemo ni we wijyanye kwa muganga

Bwana Mutahi Kagwe yavuze ko bari biteguye cyari ikibazo cy'igihe gusa Uwufise ububasha kw’isanamu Live event
Image caption Bwana Mutahi Kagwe yavuze ko bari biteguye cyari ikibazo cy'igihe gusa

Mutahi Kagwe, umunyamabanga wa Leta ushinzwe ubuzima muri Kenya yatangaje ko habonetse umuntu wa mbere ufite coronavirus muri iki gihugu.

Yavuze ko uyu ari umugore w'imyaka 27 uherutse kugera i Nairobi tariki 05/03/2020 avuye muri Leta zunze ubumwe za Amerika aciye i London mu Bwongereza.

Bwana Kangwe yabwiye abanyamakuru ko 'laboratoire' isuzuma indwara ziterwa na virus yabonye iyi ndwara muri uyu mugore ejo nijoro kuwa 12/03.

Yagize ati: "Ubu ameze neza, ntabwo arwaye, umuriro we wagabanutse, ararya ariko ntabwo yavanwa mu kato ibipimo bitaremeza ko yakize iyi ndwara"

Kenya ibaye igihugu cya 15 cya Afurika kigezemo coronavirus, ibaye igihugu cya mbere mu bigize umuryango wa Afurika y'Iburasirazuba igezemo iyi ndwara.

Bwana Kagwe yavuze ko Kenya yari yiteguye cyari ikibazo cy'igihe gusa. Gusa avuga ko nta mpamvu y'uko abaturage ba Kenya bashya ubwoba.

Ati: "Leta irakomeza ingamba zo kurinda ko iyi ndwara ikwirakwira".

Yavuze ko abantu bose bahuye n'uyu mugore bari gukurikiranwa no gushakishwa ngo bavurwe.

Ibihugu bya Afurika iyi ndwara imaze kugeramo:

Ibihugu bya Afurika iyi ndwara imaze kugeramo:

  • Egypt- 80 (2 yarabishe)
  • Algeria- 26 (2 yarabishe)
  • South Africa- 17
  • Tunisia- 13
  • Senegal- 10
  • Morocco- 6 (1 yaramwishe)
  • Ghana-2
  • Cameroon-2
  • Nigeria-2
  • Burkina Faso-2
  • Togo-1
  • DRCongo- 2
  • Côted'Ivoire - 1
  • Kenya-1
  • Gabon-1
  • Ethiopia - 1

Uyu mugore baramushimira

Bwana Kagwe yavuze ko uyu mugore ari uwo gushimirwa kuko acyumva ko atameze neza yahise yihutira kujya kwa muganga.

Ati: "Yaduhaye amazina ya buri muntu wahuye nawe muri icyo gihe, abo bose ni abantu bavuye mu Bwongereza no muri Amerika kandi twamenyesheje ambasade zabo.

"Iyi ni indwara yavuye hanze, ibi nibyo bituma dufite ikizere ko uyu ashobora kuba ari we gusa uyifite kandi dushobora kuyimukiza".

Bwana Kagwe avuga ko uyu mugore yibana bityo hari amahirwe ko atanduje benshi, kandi babashije gukurikirana abantu bose bahuye nawe.

Kenya ifatwa nk'isangano mu by'ingendo muri aka karere.

Indege ziva mu Rwanda, Burundi, Uganda na Tanzania zigwa i Nairobi zitwaye abagenzi cyangwa zihabavana zibajyana muri ibi bihugu buri munsi.

Ibihugu byinshi bikomeje ingamba zo kwirinda ikwirakwira ry'iyi ndwara mu gihe hari impungenge nyinshi ko nabyo bishobora kugerwaho n'iki cyorezo.

Kenya yahagaritse ibikorwa byose bihuriramo abantu benshi, inama, ibiterane binini by'amadini, imikino, n'ibindi bikorwa byose bihuriramo abantu benshi cyane nk'uko Bwana Kagwe abivuga.

Gusa amateraniro yo mu nsengero arakomeza mu gihe afite uburyo bw'isuku.

Gusura abantu muri za gereza muri Kenya nabyo byahagaritswe mu gihe cy'iminsi 30.

Ibikorwa bihuza amashuri nabyo byahagaritswe ariko amashuri yo arakomeza amasomo uko bisanzwe.

Ibindi bisa n’ibi