Coronavirus: Umuntu wa mbere yayikize muri Kenya, Leta yagabanyije imisoro

Pereizda Uhuru Kenyatta ubwo yatangazaga ko hari umuntu wakize iyi ndwara Uwufise ububasha kw’isanamu Kenya state house
Image caption Pereizda Uhuru Kenyatta ubwo yatangazaga ko hari umuntu wakize iyi ndwara

Byatangajwe na Perezida Uhuru Kenyatta mu ijambo yagejeje ku gihugu, ntabwo yavuze umwirondoro w'uwakize iyi ndwara, gusa yavuze ko ari amakuru meza kuri iki gihugu.

Kenya ubu ifite abantu 28 bamaze kwandura iyi ndwara, harimo batatu bashya batangajwe ejo na Bwana Kenyatta.

Birakekwa ko uwakize iyi ndwara ari mu bantu batangajwe bwa mbere ko bayanduye muri Kenya.

Abahanga mu buvuzi bavuga ko umuntu ufite ibimenyetso bidakabije ashobora gukira iyi virus mu byumweru bibiri.

Umuntu wa mbere yabonywemo iyi ndwara muri Kenya tariki 12/03/2020 bitangazwa na minisiteri y'ubuzima yaho tariki 13/03/2020.

Bwana Kenyatta ko mu gihugu hose guhera kuwa gatanu, kuva saa moya z'umugoroba (7PM) kugeza saa kumi n'imwe za mugitondo (5AM) hazajya haba umukwabu.

Uyu mukwabu (curfew) ugamije gutegeka abantu kuguma mu ngo zabo mu rwego rwo kwirinda ikwirakwira ry'iyi ndwara.

Perezida Kenyatta yatangaje kandi ivanwaho ry'imisoro yose ku bantu bahembwa amadorari $240 ku kwezi (ni arenga gato 200,000Frw), naho abandi bakajya bishyura umusoro ungana na 5% gusa.

Leta yagabanyije kandi imisoro ku mitungo ndetse n'umusoro ku nyongera gaciro (TVA), ibi bigatangira gukurikizwa kuva tariki 01/04/2020.

Hejuru y'ibi, Bwana Kenyatta yatangaje ko ku bushake bwe, n'abandi bategetsi bakuru bemeye gutanga ku mushahara wabo kugira ngo batere inkunga ikigega cyo kurwanya Covid-19.

Perezida Kenyatta na Visi Perezida William Ruto batanga 80% y'umushahara wabo mu gihe abagize guverinoma bo bazagabanya 30% ku mushahara wabo.

Yanatangaje ko leta yagennye miliyoni $100 z'amadorari yo kugoboka abakennye kurusha abandi bari kugirwaho ingaruka n'iyi ndwara, abantu bakuze ndetse n'impfubyi.

Ibindi bisa n’ibi