DR Congo: Ebola yishe 10 mu barwayi 16 bashya babonetse mu ntara ya Équateur

Abaganga bashyingura umwana w'amezi 11 mu ntara ya Kivu y'amajyaruguru ku itariki ya 5 y'ukwa gatanu mu 2019

Ahavuye isanamu, EPA

Insiguro y'isanamu,

Abaganga bashyingura umwana w'amezi 11 mu ntara ya Kivu y'amajyaruguru ku itariki ya 5 y'ukwa gatanu mu 2019

Minisiteri y'ubuzima muri Repubulika ya Demokarasi ya Kongo kuri uyu wa gatandatu yatangaje amakuru mashya yuko Ebola ihagaze mu ntara ya Équateur iri mu burengerazuba bw'igihugu, ivuga ko imaze kwica abantu 10.

Abo bari mu barwayi bashya 16 bamaze kuboneka guhera ku itariki ya mbere y'uku kwezi kwa gatandatu, ubwo hatangazwaga ko Ebola yongeye kwaduka muri iki gihugu ku nshuro ya 11 mu mateka yacyo.

Hari ahantu habiri habaye izingiro ry'iyi ndwara: hamwe ni i Mbandaka, mu murwa mukuru w'intara ya Équateur, ahabonetse abarwayi ku itariki ya 11 y'ukwa gatanu.

Hakaba no mu karere k'ubuzima ka Bikoro, kuri kilometero 148 mu majyepfo ya Mbandaka, aho umugore wari wagiye mu muhango wo gushyingura i Mbandaka yatashye.

Kuva ku itariki ya 14 y'ukwezi gushize kwa gatanu, DR Congo yatangiye kubara kugeza ku minsi 42 nta wundi murwayi mushya ubonetse kugira ngo itangaze ko Ebola yari yadutse mu burasirazuba bw'igihugu ku itariki ya mbere y'ukwa munani mu 2018 icitse.

Iyo Ebola yo mu burasirazuba yatangajwe ko yahitanye abantu 2,280.

Yabaye iya 10 mu mateka ya DR Congo - iba n'iya kabiri mbi cyane mu mateka y'isi nyuma y'iyibasiye ibice bimwe byo mu burengerazuba bw'Afurika kuva mu 2013 kugera mu 2016 ikica abarenga 11,300.

Ebola ni ndwara ki?

  • Ebola ni virusi itangira itera umuntu guhinda umuriro, gucika intege cyane, kubabara imitsi no kubabara mu muhogo.
  • Uko irushaho gukomera, uyirwaye araruka, agacibwamo ndetse akavira imbere ndetse akava n'amaraso mu bice byo hanze by'umubiri.
  • Abantu bayandura iyo bagize aho bahurira n'abayirwaye, nk'ahari igikomere ku mubiri, mu kanwa no mu mazuru, mu maraso, mu myanda iva mu mubiri cyangwa mu cyuya cy'uyirwaye.
  • Abarwayi ba Ebola akenshi bahitanwa n'umwuma ndetse no kunanirwa gukora kw'ingingo zimwe na zimwe z'umubiri.