Rwanda - Covid-19: 'Ndishimye ko banteye urukingo' – umuganga w'i Kabgayi
Ahavuye isanamu, RBA
Umuturage wo mu cyiciro cy'abakuze ari gukingirwa Covid mu karere ka Bugesera
Gukingira Covid-19 byatangiye ku mugaragaro mu bitaro bitandukanye nyuma y'umunsi umwe doze za mbere z'inkingo z'iki cyorezo zigeze mu gihugu, abakingiwe bashyize umukono ku nyandiko ko batazagira uwo bakurikirana ku ngaruka urukingo rushobora kubagiraho.
Ku bitaro byagejejweho inkingo uyu munsi ku wa gatanu gukingira ni byo bahereyeho, bamwe mu bamaze gukingirwa babwiye BBC ko bishimye, nubwo hari abafite impungenge.
Nyuma yo kwakira doze zirenga 300,000 z'inkingo za Oxford-AstraZeneca na Pfizer zo muri gahunda ya Covax, ejo ku wa kane izi nkingo zagejejwe ku bitaro bitandukanye hakoreshejwe kajugujugu za gisirikare n'imodoka z'ibitaro ziherekejwe n'iza polisi.
Minisiteri y'ubuzima yatangaje ko izi nkingo zajyanywe ku bitaro 50 n'ibigo nderabuzima 508 hirya no hino mu gihugu, kandi "ziterwa abazigenewe mu gihe cy'amasaha 48 uhereye ku wa gatanu."
Iyi minisiteri yavuze ko abaherwaho ari abakora kwa muganga, abakuze, n'abandi bafite ibyago byinshi byo kwandura no kwibasirwa n'iki cyorezo.
Ku bitaro bya Kabgayi umwe mu baganga utifuje gutangazwa amaze gukingirwa yabwiye BBC ati: "Ndishimye ko banteye urukingo, ariko ni doze ya mbere kandi hakenerwa ebyiri, n'ubundi ndakomeza kwirinda uko bisanzwe".
Undi wo ku bitaro bya Ruhengeri ati: "Bararunteye numva rwose biranshimishije, gusa twese turacyibaza ngo 'mu gihe haba ingaruka mbi ziruvuyeho ni inde uzabibazwa?'"
Abakingiwe basabwaga gusinya inyandiko ivuga ko bemeye gukingirwa ku bushake no kudakurikirana inzego zatanze uru rukingo "ku ngaruka zizwi cyangwa zitazwi zifitanye isano n'uru rukingo".
Abagore batwite bari mu byiciro by'abagomba gukingirwa ntabwo batewe uru rukingo.
Ahavuye isanamu, Rwanda Health
Umuganga uri gukingirwa ku bitaro bya Nyamata mu karere ka Bugesera
Mu kwezi gushize, mu buryo butatanzweho amakuru arambuye, hari umubare w'abantu barimo abaganga n'abategetsi bakuru bakingiwe hakoreshejwe "inkingo nkeya zabonetse ku bufatanye mpuzamahanga", nk'uko minisiteri y'ubuzima yabivuze.
Mu gitondo cyo kuri uyu wa gatanu, Minisitiri w'ububanyi n'amahanga Vincent Biruta yatangaje ko yakiriye izindi doze 50,000 z'impano y'inkingo leta y'Ubuhinde yahaye iy'u Rwanda.
Mu Rwanda, abantu barenga 19,000 banduye Covid-19 naho abagera kuri 266 imaze kubica, nk'uko bitangazwa na minisiteri y'ubuzima.
Minisitiri w'ubuzima mu Rwanda Dr Daniel Ngamije yatangaje ko bafite intego yo gukingira 30% by'abaturage muri uyu mwaka na 60% mbere y'uko 2022 irangira.
