Ikibuga cy'indege cy'i Buruseli ntikizafungurwa mbere yo kuwa kabiri

Aho abagenzi banyura bajya gufata indege ku kibuga cya Zaventem nyuma y'ibisasu Uwufise ububasha kw’isanamu PA
Image caption Aho abagenzi banyura bajya gufata indege ku kibuga cya Zaventem nyuma y'ibisasu

Abategetsi b'Ububirigi baravuga ko ikibuga cy'indege cya Zaventem kitazafungurirwa abagenzi mbere yo kuwa kabiri.

Abenjeniyeri n'abatekinisiye bagomba kubanza gusuzuma neza ubukomere bw'inyubako ziri aho abagenzi bategerereza indege nyuma y'ibitero byagabwe kuri icyo kibuga kuwa kabiri wa kino cyumweru.

Abantu 31 baguye muri ibyo bitero.

Hagati aho, abantu bakomeje kwibaza niba harakozwe ibihagije kugirango ibyo ibitero bibe byarakumiriwe.

Ikinyamakuru cyo mu Bufaransa, Le Monde, cyasohoye icyo kivuga ko ari inyandiko z'ibazwa (zitagombaga kujya ahagaragara) igipolisi cyagiranye na Salah Abdeslam, ukekwaho kugira uruhare mu bitero by'iterabwoba by'i Paris.

Ikinyamakuru kivuga ko yeretswe amafoto y'abiyahuzi bagabye ibitero ku kibuga cy'indege cyo mu Bubirigi maze ahakana ko atabazi ariko ngo uwamubazaga ntiyamuhatirije kugirango agire ibindi avuga.

Bamwe mu bagabye ibitero baramenyekanye

Ahantu abagenzi biyandikishiriza kuri icyo kibuga cy'i Buruseli hangijwe cyane n'ibyo bisasu.

Abiyahuzi babiri bari bahari baramenyekanye.

Ibimenyetso bya DNA bahasize byerekanye ko ari Najim Laachraoui na Brahim el-Bakraoui.

Bafotowe na za kamera z'umutekano zo kuri icyo kibuga cy'indege mbere yuko ibisasu biturika.

Naho undi mugabo wa gatatu uri iburyo ntabwo abategetsi bari batanga umwirondoro we ku mugaragaro.

Uwufise ububasha kw’isanamu AFP
Image caption Kamera z'umutekano (CCTV) zafotoye Laachraoui, (lbumoso), Brahim el-Bakraoui (hagati ) n'undi mugabo utaramenyekana

Abavandimwe Brahim na Khalid el-Bakraoui bo bagabye igitero ku hantu abagenzi bategerereza gari ya moshi yo munsi y'ubutaka i Maelbeek.

Umunyamakuru wa BBC, Anna Holligan, uri i Buruseli aravuga ko amabisi na gari moshi nyinshi zo mu y'ubutaka birakora nkuko bisanzwe ariko ngo haracyari abasirikare bacunze umutekano mu mihanda.