Faycal C yashinjwe iterabwoba mu Bubirigi
Ahavuye isanamu, AFP
Ibyo bitero byagabwe kuwa kabiri ku kibuga cy'indege cya Zaventem n'aho abagenzi bategera gari ya moshi yo munsi y'ubutaka.
Mu Bubirigi hari umugabo washinjwe icyaha cy'ubwicanyi bushingiye ku iterabwoba bufitanye isano n'ibitero by'iterabwoba byibasiye Buruseli bigahitana abantu 31 mu ntangiriro za kino cyumweru.
Uwo ukekwa, ni Faycal C, akaba ariwe muntu wa mbere ushinjwe ibyaha by'iterabwoba ku birebana n'ibyo bitero by'abiyahuzi by'i Buruseli.
Ubushinjacyaha ntabwo bwemeje amakuru y'ibitangazamakuru byo mu Bubirigi avuga ko Faycal C ariwe mugabo wa gatatu wafotowe na za kamera z'umutekano zo ku kibuga cy'indege cya Zaventem yambaye ingofero ari kumwe n'abandi babiri bagabye ibyo bitero.
Bivugwa ko uwo mugabo wa gatatu yahunze adaturikije ibisasu yari afite.
Ubushinjacyaha bwo mu Bubirigi buravuga ko Faycal C afungiye hanze y'ibiro by'umushinjacyaha i Buruseli guhera kuwa kane.
Abagiye gusaka rmu nzu ye ngo nta ntwaro bahasanze.
Itangazo ry'Ubushinjacyaha rivuga ko Faycal ashinjwa kugira "uruhare mu bikorwa by'umutwe w'iterabwoba, ubwicanyi bushingiye ku iterabwoba no kugerageza kwica abantu hakoreshejwe iterabwoba."
