Amatora ya Amerika 2016: Sanders yatsinze Clinton muri leta ya Wyoming

Bernie Sanders n'umugore we Jane mu bikorwa byo kwiyamamaza i Laramie, Wyoming, ku ya 05/04 Uwufise ububasha kw’isanamu AP
Image caption N'ubwo yatsinze muri Wyoming, Bernie Sanders aracyafite urugendo rurerure

Bernie Sanders yatsinze amatora aheruka mu cyiciro cy'ibanze mu nzira yo guhatanira guhagararira ishyaka ry'Abademokarate mu matora y'umukuru w'igihugu muri Leta zunze Ubumwe za Amerika, nyuma y'itsninzi muri leta ya Wyoming.

Abatorwa 14 bazagabanywa mu buryo bukurikije imibare y'abakandida. Bwana Sanders amaze gutsinda leta zirindwi mu munani zimaze gutora.

Ariko uwo bahanganye Hillary Clinton aracyayoboye muri rusange. Bombi ubu bari kwibanda ku matora y'ibanze muri leta ikomeye ya New York azaba muri uku kwezi.

Mu ishyaka ry'Abarepubulikani, Ted Cruz arizera kubona indi ntsinzi muri leta ya Colorado.

Uwufise ububasha kw’isanamu AP
Image caption Madamu Clinton aracyafite amahirwe akomeye yo gutsinda ku ruhande rw'Abademokarate

Mu makoraniro yahuje amaleta ku wa Gatanu, Bwana Cruz yabonye abamushyigikiye 21 naho Donald Trump abona babiri gusa, n'ubwo akiyoboye urutonde rw'abahatanira guhagararira ishyaka ry'Abarepubulikani.

Bwana Cruz afite abantu 520 naho Bwana Trump afite 743. Bwana Cruz arizera gutsindira amajwi akenewe kugira ngo aburizemo kuba Bwana Trump yahita abona itike y'ako kanya yo guhagararira ishyaka ry'Abarepubulikani noneho bikazatuma ishyaka rihitamo uzarihagararira mu nama rusange yaryo mu kwezi kwa Karindwi.

Ahandi hantu hitezwe cyane kandi hakomeye ku mashyaka yombi ni mu matora rusange azabera i New York ku itariki ya 19//04: ku ruhande rw'Abademokarate hari amajwi 291 ashakwa naho ku Barepubulikani hari 95.

Uwufise ububasha kw’isanamu AP
Image caption Ted Cruz amaze igihe yiyamamariza i New York

N'ubwo Bwana Sanders yatsinze muri leta ya Wyoming, aracyafite amajwi y'abantu bangana na 1.061 mu gihe madamu Clinton afite 1.749 uteranyijeho amajwi 469 y'abantu baba bahagarariye ishyaka bitwa aba 'superdelegates'. Kugira ngo umukandida atsinde, akeneye amajwi 2.383.

Amatora y'umukuru w'igihugu ubwayo, azaba ku ya 8/11, azashaka umusimbura wa Barack Obama, umu perezida wo mu ishyaka ry'Abademokarate uzarangiza manda ye nyuma y'imyaka umunani ari ku butegetsi. Itorwa rye ryatumye Abarepubulikani bafata ubuyobozi bw'ibyumba byombi by'inteko ishinga amategeko.

Uwufise ububasha kw’isanamu Reuters
Image caption Donald Trump amaze igihe yiyamamariza muri leta avukamo ya New York

Ahandi hateganyijwe amatora

19 z'Ukwezi kwa Kane: Amatora y'ibanze muri New York

26 z'ukwezi kwa Kane: Amatora y'ibanze muri Pennsylvania, Connecticut, Delaware, Maryland na Rhode Island