Abantu bo muri Bulgariya bafotowe bari kuboha abimukira
Ahavuye isanamu, BTV
Abagabo batatu basa n'abafite ubwoba nyuma yo gufatwa n'abantu babahagaze hejuru banabazirika amaboko
Amashusho yafashwe kuri telefoni muri Bulgariya yerekana abantu bafashe abimukira batatu bakababohera amaboko ku migongo baryamye hasi.
Umwe mu bantu yumvikanye ababwira ngo "Nimusubire muri Turukiya, Oya muri Bulgariya"
Urubuga rutangaza amakuru kuri interineti muri Bulgariya, BTV, rwanditse ko amashusho yafatiwe mugace k'imisozi ka Strandja, hafi y'umupaka wa Turukiya.
Umuyobozi ukuriye urwego rugenzura umupaka wa Bulgariya, Antonio Angelov, yavuze ko ibyo bintu binyuranye n'amategeko, nk'uko bivugwa na BTV.
Bulgariya yubatse urukuta rw'amashyanyarazi rwa kilometero 95 ku mupaka wayo isangira na Turukiya ureshya na kilometero 269.
Bwana Angelov, avuga ko abimukira batatau bagaragara kuri ayo mashusho ari abo muri Afuganisitani. Aya mashusho yabaye inkuru ikomeye muri Bulgariya kuri uyu wa mbere.
Abantu bashakaga kwirukana abimukira, barimo umwe wari witwaje umuhoro bahagaze kuri abo bimukira ndetse umwe yumvikanye avuga mu cyongereza kibayabaye ababwira gusubira muri Turukiya. Abimukira bagaragaraga bafite ubwoba kandi ntibagerageje guhangana.
Amakimbirane na Macedoniya
Ubugereki buturanye na Bulgariya bwagiranye amakimbirane na Macedoniya ku wa Mbere kubera uburyo iki gihugu gifata nabi abimukira ku mupaka wa Idomeni.
Umuryango w'abaganga batagira umupaka wa MSF wavuze ko abantu 260 bakomeretse igihe abashinzwe umutekano muri Macedoniya bamishaga ibyuka biryana mu maso nyuma y'uko abimukira babarirwa mu majana bageragezaga kwambuka umupaka. abagera kuri 30 barashwe ibisasu bitica, barimo n'abana batatu bari munsi y'imyaka 10. Kugeza kuri uyu wa mbere hari hakiri impagarara ku mupaka.
Minisitiri w'Intebe w'Ubugereki, Alexis Tsipras yamaganye ikoreshwa ry'ibyuka biryana mu maso n'amasasu atica, asobanura ko ibyo "ari icyimwaro ku mico y'abanyaburayi".
Ariko minisiteri y'ububanyi n'amahanga muri Macedonoya yatsindagiye ko inzego zayo z'umutekano zitakoresheje amasasu atica, yongeraho ko abashinzwe umutekano 23 bakomeretse. Polisi yari yasabye abategetsi mu Bugereki kugenzura no kugena uburyo bw'umutekano.
Abimukira barenga 11.000 bamaze ibyumweru byinshi baba mu nkambi ya Idomeni mu buryo bumeze nabi cyane.
Ubugereki buracyari inzira ikoreshwa n'abimukira mu gace ka Balkan, benshi bahunga intambara muri Siriya bizera kugera mu Burayi.
Hari impungenge ko kwirukana abimukira basubizwa muri Turukiya, byemejwe n'Umuryango w'Ubumwe bw'Ibihugu by'Uburayi, EU. bishobora kuba bibangamiye uburenganzira bwa zimwe mu mpunzi.
