Icyegeranyo kivuga ko polisi ya Chicago yamunzwe n'ivangura

Icyegeranyo cyakozwe kuri polisi ya Chicago muri Leta Zunze Ubumwe za Amerika cyerekana ko urwo rwego rwamunzwe n'ivanguraruhu.

Itsinda ry'abantu bashyizweho nyuma y'imyigaragambyo yamagana irasa rikorwa na polisi, ryavuze ko bamwe mu bapolisi "badaha agaciro ubuzima bw'abantu batari abazungu".

Iryo tsinda ryavuze ko urwego rwa polisi rwibasira abo mu bwoko bw'Abirabura n'aba Hisipaniya kandi rugakoresha imbaraga zirenze izemewe n'amategeko ndetse abapolisi bakabiceceka.

Icyegeranyo gisaba ko haba impinduka zikomeye zigera ku 100.

Iryo tsinda ryasanze ko 74% by'abantu babarirwa mu majana barashwe n'abapolisi mu myaka ya vuba ishize, bari Abirabura, n'ubwo Abirabura bagize 33% gusa by'abaturage bose muri Chicago.

Incamake y'icyegeranyo, cyasabwe n'umuyobozi w'umujyi wa Chicago, Rahm Emanuel, isobanura ko ubwoba ndetse no kutagirira icyizere igipolisi bifite ishingiro.

Umuyobozi mukuru mushya wa Polisi, Eddie Johnson, nawe akaba ari Umwirabura ubwe, yarahiriye kurandura ivanguraruhu rirangwa mu gipolisi. Nyuma yo kurahirira imirimo mishya yabwiye abanyamakuru ati:

"Dufite ivanguraruhu muri Amerika. Dufite ivanguraruhu i Chicago. Ubwo rero birumvikana ko dufite n'ivanguraruhu mu rwego rwacu. Intego yanjye ni ukurandura iryo vangura."

Urwego rwa polisi mu mujyi wa Chicago ni urwa gatatu mu bunini muri Leta Zunze Ubumwe za Amerika.

Umuyobozi uhagarariye itsinda ryakoze icyegeranyo, Lori Lightfoot, yavuze ko icyo cyegeranyo ari "umusingi w'impinduka" ndetse yasabye polisi n'abayobozi kuzahura imibanire myiza hagati y'igipolisi n'abaturage.

Yabwiye abanyamakuru ati:

"Akababaro n'uburakari abaturage b'uyu mujyi batweretse...ni ikintu gikwiye kumvwa, bikwiye kwitabwaho. Kandi niba tugomba gutera intwambwe, bigomba gukurikizwa."

Itsinda ryakoze ubugenzuzi ku myitwarire y'igipolisi n'urwego rugenzura abapolisi ryasanze "rwasenyutse" ndetse risaba ko rusimbuzwa "urundi rushya kandi rukorera mu mucyo".

Emanuel yagize ati: "Nta shiti ko dufite akazi kenshi ko gukora" yongeraho ko abantu bagomba kugira icyizere mu rwego rusuzuma imyitwarire ya polisi.

Yavuze ko agitegereje gusobanurirwa n'abakoze ubugenzuzi ndetse no kubona icyegeranyo cyose, mbere yo gutanga ibindi bisobanuro birambuye.

Greg Livingston, impirimbanyi y'uburenganzira bwa kiremwamuntu yavuze ko icyi cyegeranyo "kibyutsa imitekerereze kuri iki kibazo kandi gicana urumuri mu mwijima."

Imibare yatangajwe mu kwezi gushize yerekanye ko ubwicanyi muri Chicago bwazamutse ku kigero cya 84% mu mezi ya mbere y'umwaka wa 2016 ugereranyije n'umwaka ushize.

Uyu mujyi wagaragayemo irasa rigera ku nshuro 575 n'ubwicanyi 125 ugereranyije n'irasa 290 ndetse n'ubwicanyi 68 mu gihe kimwe mu mwaka wa 2015.

Umuyobozi wa polisi, Johnson, ufite imyaka 27 y'uburambe mu kazi, yatangiye imirimo ye mu gihe cy'umujinya wa rubanda utewe n'iraswa ry'umwana w'ingimbi Laquan MacDonald, wishwe n'umupolisi w'umuzungu.

Iraswa rye ryateye impagarara z'imyimyigaragambyo ndetse rituma minisiteri y'ubucamanza itangiza iperereza mu bikorwa by'irasa bikorwa n'urwego rwa polisi ya Chicago.