Putin aranenga ibihano ku bakinnyi b'Uburusiya
Ahavuye isanamu, AP
Putin avuga ko nta mukinnyi wagombye guhanwa kubera amakosa y'abandi
Perezida w'Uburusiya, Vladmir Putin, yavuze ko bitari bikwiye ko ibihano bikomeza kubuza abakinnyi ngororangingo bo mu gihugu cye kujya mu marushanwa mpuzamahanga harimo n'imikino ngororangingo iteganijwe mu minsi iri imbere i Rio muri Bresil.
Ishyirahamwe mpuzamahanga ry'imikino ngororangingo ku isi (IAAF) ryafashe icyemezo cyo kutavaniraho ibihano abakinnyi b'Uburusiya bahawe nyuma yo gushinjwa gufata imiti ibaha ingufu itemewe kandi n'igihugu cyabo kikabigiramo uruhare.
Abakinnyi b'Uburusiya bashobora kujya mu marushanwa ku giti cyabo baramutse berekanye ko ari abere.
Perezida Putin yasabye Komite mpuzamahanga y'imikino ngororangingo (IOC) kugira icyo ibikoraho.
Uburusiya bwabaye buhagaritswe muri IAAF mu kwezi kwa cumi na rimwe muri 2015 nyuma yaho icyegereranyo cy'ishyirahamwe WADA - rishinzwe kurwanya imiti itemewe yongerera ingufu abakinnyi - kivuze ko mu Burusiya hari umuco wo gufata bene iyo miti, ku buryo n'inzego zishinzwe iperereza z'icyo gihugu zibirimo.
