Ubwicanyi muri Iraki: Ibisasu byatewe na IS byishe abantu 125 bahahaga mu kwezi kwa Ramadan.

Biravugwa ko benshi mu bapfuye ari abana 3/7/2016 Uwufise ububasha kw’isanamu Reuters
Image caption Biravugwa ko benshi mu bapfuye ari abana

Polisi iravuga ko abantu bagera ku 125 bishwe abandi benshi barakomerekera mu bitero bibiri byagabwe n'umutwe w'abarwanyi ba kiyislamu wa IS mu murwa mukuru wa Iraki, Bagdad.

Mu gitero cya mbere cyo ku wa Gatandatu mu gicuku, imodoka yari irimo igisasu cy'ubwiyahuzi yaturikiye hafi ya resitora n'inzu y'iguriro mu gace ka Karrada.

Imihanda yari yuzuye abantu bahaha nyuma y'irenga ry'izuba muri uku kwezi gutagatifu kwa Ramadan.

Igisasu cya kabiri cyaturikiye mu gace kiganjemo aba Shiya mu majyaruguru y'umurwa mukuru.

Ibi bisasu, byishe abantu benshi muri uyu mwaka muri Iraki, bibaye nyuma y'icyumweru kimwe inzego z'umutekano za Iraki zifatiye umujyi wa Falluja ziwukuye mu bugenzuzi bw'abarwanyi ba Islamic State.

Uwufise ububasha kw’isanamu AP
Image caption Umuriro ukomeye wakongeje agace ka Karrada Baghdad mu gihe cy'amasaha menshi

Mu itangazo ryakwirakwijwe ku rubuga rwa interneti ku wa Gatandatu n'abashyigikiye umutwe w'aba Suni b'abahezanguni, abarwanyi ba jihadi bigambye ko ari bo bagabye igitero i Karruda, cyanateye inkongi ikomeye ku muhanda.

Ibiro ntaramakuru AP, biravuga ko benshi mu bishwe, hafi ya sa sita z'ijoro, bari abana.

Inzu nyinshi zangijwe cyane ndetse zari zikigurumana mu masaha ya kare ku Cyumweru. Minisitiri w'intebe Haider al-Abadi yasuye ahabereye igitero mu gitondo.

Uwufise ububasha kw’isanamu Reuters

IS igenzura ibice binini by'amajyaruguru n'uburengerazuba birimo Mosul, umujyi wa kabiri munini muri Iraki.

Ariko uyu mutwe umaze igihe ku gitutu muri Iraki no muri Siriya aho wibasiwe n'ingabo za guverinoma ndetse n'inyeshyamba zishyigikiwe na Leta Zunze Ubumwe za Amerika.

Ibitero byica cyane bya IS

Uwufise ububasha kw’isanamu AP

9/6/2016: Abantu bagera kuri 30 biciwe muri Bagdadi no hafi yayo mu bitero bibiri byigambwe na IS

17/5/2016: Ibitero bine byishe abantu 69 muri Bagdadi; dutatu mu duce twatewe ni utwiganjemo aba Shiya.

11/5/2016: Imodoka itwaye ibibombe by'ubwiyahuzi yishe abantu 93 i Baghdad barimo 64 bari mu isoko mu karere k'aba Shiya ka Sadr.

1/5/2016: Imodoka ebyiri z'ibisasu by'ubwiyahuzi zishe abantu 33 mu mujyi uri mu majyaruguru wa Samawa

26/3/2016: Igitero cy'ubwiyahuzi cyibasiye abarebaga umupira w'amaguru mu mujyi wa Iskandariya, cyica abantu 32.

06/3/2016: Igikamyo cyari gitwaye lisansi cyaturikiye kuri bariyeri, mu mujyi wa Hilla cyica abantu 47.

28/2/2016: Ibitero bibiri by'ubwiyahuzi byishe abantu 70 mu mujyi wa Sadr.