Amatora muri Ostraliya: Amatora ashobora gutera inteko ishinga amategeko kutagira ubwiganze
Ahavuye isanamu, Getty Images
Bwa mbere mu myaka myinshi ishize, inteko ishinga amategeko na sena byahatanirwaga mu matora
Haracyari iminsi myyinshi kugira ngo Ostraliya imenye ibyavuye mu matora mu gihe ibarura ry'amajwi rikomeje.
Imyanya 12 ku 150 yo mu nteko ishinga amategeko iracyari mu rujijo, amajwi y'abatoye bakoresheje iposita cyangwa se batari mu gihugu azakomeza ku wa Kabiri.
Igiteranyo cy'ibarura rya Komisiyo y'amatora kirerekana ko ishyaka rya Labor rifite imyanya 71 naho iriri ku butegetsi ry'aba Liberal rifite 67.
Abakandida bigenga ndetse n'amashyaka mato babonye imyanya myinshi ku buryo butigeze bugaragara mbere.
Minisitiri w'intebe Malcom Turnbull yavuze ko yiteze kugira imyanya 76 akeneye kugira ngo ashinge guverinoma. Amajwi y''abatoye bakoresheje iposita ari buhe amahirwe abakandida be.
Ahavuye isanamu, Reuters
Umuyobozi w'ishyaka rya Labor Bill Shorten yavuze ko abahanganye nawe batakaje uburenganzira bwo kuyobora.
Abasesenguzi baratanga impuruza ko uru rujijo rushobora gutuma amasoko y'imigabane ahungabana igihe azaba afunguye ku wa Mbere. Bwana Turnbull yahamagaje amatora by'igitaraganya kubera ko muri sena nta bwiganze bwari buhari bigatera gutuma gahunda ze z'ubukungu zidashyirwa mu bikorwa.
Ahavuye isanamu, EPA
Pauline Hanson yongeye kugaruka mu ruhando rwa politike muri aya matora
Ahavuye isanamu, Getty Images
Umudepite wo mu ishyaka ry'abaharanira kurengera ibidukikije Adam Bandt yatoye ari kumwe n'umuryango we i Melbourne
