Polisi ya Kenya yitabye mu rukiko nyuma y'urupfu rwa Willie Kimani

Abigaragambya bafite isanduku iriho amaraso atari yo Uwufise ububasha kw’isanamu Reuters
Image caption Abigaragambya basize bakoresheje ibara ry'umutuku nk'ikimenyetso cy'amaraso ku isanduku, bamagana urupfu rw'umunyamategeko Willie Kimani

Abapolisi batatu bo muri Kenya bagejejwe imbere y'urukiko kubera urupfu rw'impirimbanyi y'uburenganzira bwa kiremwamuntu, wari waraburiwe irengero, umurambo we ukaboneka ku wa Gatanu.

Willie Kimani, yazimiye nyuma yo gutanga ikirego cy'uwo yunganira nawe wishwe, ari kumwe n'umushoferi, waregaga umupolisi.

Ihuriro ry'abanyamategeko ryasabye abunganira abandi mu nkiko gukora imyigaragambyo ntibajye mu nkiko, kandi imyigaragambyo yateguwe mu gihugu hose.

Abapolisi batatu ntacyo bavuze.

Umunyamakuru wa BBC ukorera i Nairobi, Ferdinand Omondi avuga ko imanza zose zari ziteganyijwe muri iki cyumweru zizasubikwa kugeza abanyamategeko bavuye mu myigaragambyo.

Urupfu rw'iyi mpirimbanyi rwateje impagarara muri Kenya kandi benshi bashinja urwego rwa polisi kuba rwarakoze ubwicanyi butemewe n'amategeko mu myaka ya vuba ishize.

Ku mbuga nkoranyambaga abantu bakoresheje akamenyetso gatsindagira ubutumwa, bita 'hashtag' bagira bati #StopExtrajudicialKilling bishatse kuvuga ngo "#hagarikaUbwicanyiButemewen'Amategeko" muri Kenya.

Urwego rushinzwe uburenganzira bwa kiremwamuntu muri Kenya ruvuga ko inzego za polisi zishe abantu 25 mu buryo bunyuranye n'amategeko hagati y'umwaka wa 2013 na 2015.

Cyakora uru rwego, rutegamiye kuri leta, IMLU, ruvuga ko rufite imibare y'abantu 97 y'ubwicanyi bwakozwe muri 2015 honyine.