Donald Trump aravuga ko amatora ashobora kuzibwa

Donald Trump - uhatanira umwanya w'umukuru w'igihugu muri Leta zunze ubumwe za Amerika - yavuze ko amatora ateganijwe mu kwezi kwa 11 ashobora kuzibwa.

Yabwiye imbaga y'abari baje kumwumva i Columbus muri Ohio ko akomeje kumva ko ayo matora azaba abogamye.

Yanabisubiyemo kuri televiziyo ya Fox News avuga ati: "Nizeye ko ishyaka ry'aba Republican ryafunguye amaso naho ubundi bazatwiba amajwi"

Ariko rero nta gihamya yatanze.

Yanavuze ko kandi Hillary Clinton bahanganye wo mu shyaka ry'abademokarate ari "shitani".

Donald Trump amaze iminsi anengwa cyane kubera amagambo ataranyuze benshi yavuze ku babyeyi b'umusirikare b'umuyisilamu wo mu ngabo za Amerika waguye ku rugamba.