Perezida wahagaritwe Dilma Rousseff aratanga ubuhamya mu rubanza rwo kumweguza

Urubanza rwo kweguza Dilma Rousseff rurafata indi ntera kuri uyu wa Mbere aho perezida wahagaritswe ari bwiregure muri sena.

Madamu Rousseff araregwa guhindura imibare y'ingengo y'imari kugira ngo ahishe ikibazo cy'izahara ry'ubukungu.

Ahakana ibi birego akavuga ko gushaka kumweguza bisa no guhirika ubutegetsi.

Muri iki cyumweru abasenateri bazatora niba bazamweguza burundi cyangwa niba bamusubiza ku butegetsi.

Kugira ngo yeguzwe burundi ku butegetsi, hakenewe abasenateri 54 ku giteranyo cya 81 bagomba gutora babishyigikiye.

Ikinyamakuru Folha de Sao Paulo kivuga ko cyavuganye n'abasenateri bose kandi ko 52 bavuga ko bashyigikiye icyemezo cyo kumweguza.

18 babwiye iki kinyamakuru ko badashyigikiye icyemezo naho 11 ntibigeze bavuga aho bahagaze.

Madamu Rousseff w'imyaka 68 naramuka yegujwe, perezida uri ku butegetsi by'agateganyo, Michel Temer azakomeza ategeke kugeza muri kwezi kwa Cumi na Kabiri 2018.

Bwana Temer, wahoze ari visi perezida wa Madamu Rousseff, yafashe umwanya wa perezida mu kwezi kwa Gatanu nyuma y'uko Rousseff ahagarikiwe ku butegetsi hategerejwe urubanza.

Madamu Rousseff arahabwa iminota 30 yo kwisobanura kandi byitezwe ko ari buvuge ijambo rikomeye ashyigikira ibyo yakoze ku butegetsi bwe.

Mu bihe byashize, perezida Rousseff yavuze ko kumuhagarika ku butegetsi ari amayeri y'abatavuga rumwe na we muri politike yo kurangiza imyaka 13 ishyaka ry'abakozi rimaze ku butegetsi.