Mazutu mbi "yoherezwa" muri Afurika

Imodoka Uwufise ububasha kw’isanamu AFP

Icyegeranyo gishya cy'umuryango utegamiye kuri leta wo mu Busuwisi, Public Eye, kiravuga ko hari ibigo by'ubucuruzi mu Busuwisi bicuruza muri Afurika mazutu ihumanye cyane ku buryo idashobora gucuruzwa mu Burayi.

Umutwe w'icyegeranyo ugira uti: "mazutu y'umwanda" kikavuga ko abacuruzi bagendera ku mategeko ajenjetse bakunguka mu bucuruzi bwa mazutu itujuje ubuziranenge icuruzwa ku baguzi b'abanyafurika.

Icyegeranyo kivuga ko ibipimo byafashwe mu bihugu 8 bitandukanye by'Afurika kuri amwe mu mavuta ya mazutu byerekanye ko urugero rwa sulphur iri muri aya mavuta rukubye inshuro zirenga 300 ugereranije n'urugero rwemerwa mu bihugu by'i Burayi.

Nubwo icyegeranyo cyemera ko ibi bikorwa byubahirije amategeko y'imbere muri ibyo bihugu, ngo umwuka uturuka muri ayo mavuta ngo ushobora kongera indwara z'ubuhumekero nka asima na gapfura.

Uwufise ububasha kw’isanamu AFP
Image caption ONU ivuga ko ibyuka byanduza ikirere bibangamiye ibihugu biri mu nzira y'amajyambere.

Icyegeranyo kivuga ko ibigo bine byo mu Busuwisi Vitol,Trafigura, Addax and Oryx na Lynx Energy byungukira muri ubu bucuruzi nk'ibinyamigabane mu bigo bikwirakwiza ibi bicuruzwa.

Trafigura na Vitol byavuze ko iki cyegeranyo gikoze nabi kandi bikorana n'ibigo by'ubucuruzi byitwararika ku mategeko y'iwabyo.

Naho mu bigo bikwirakwiza aya mavuta byavuzwe muri iki cyegeranyo, bitatu muri byo byamaze gusubiza bivuga ko byubahiriza amategeko asabwa ku isoko kandi ko nta nyungu byagira mu gutandukira amabwiriza y'ubuziranenge.