Muri Gabon Ping arasaba ko Bongo afatirwa ibihano
Ahavuye isanamu, AFP
Jean Ping avuga ko ariwe watsinze amatora y'umukuru w'igihugu yabaye mu kwa munani.
Muri Gabon, Jean Ping uri ku isonga ry'abatavuga rumwe n'ubutegetsi muri Gabon, arasaba amahanga n'abatuye Gabon guhangana n'ubutegetsi bwa Perezida Ali Bongo nyuma y'amatora y'umukuru w'igihugu yo mu kwezi kwa munani yakuruye impaka zikomeye.
Perezida Bongo wari ucyuye igihe niwe watsinze ayo matora ariko Jean Ping bahataniraga umwanya wa Perezida akomeje kuvuga ko ariwe wayatsinze.
Ahavuye isanamu, AFP
Ali Bongo yageze ku butegetsi muri 2009 asimbuye se
Indorerezi zo mu muryango w'ubumwe bw'Uburayi zavuze ko habaye uburiganya muri ayo matora cyane cyane mu karere Ali Bongo akomokamo aho abayitabiriye bageze hafi ku ijana ku ijana.
Jean Ping arasaba ko Perezida Bongo amahanga amufatira ibihano hamwe n'abandi ashinja kuba barafatanije nawe mu gufata ubutegetsi ku ngufu za gisirikare ariko binyuze mu matora.
Ahavuye isanamu, Getty Images
Abashyigikiye Jean Ping, nyuma y'amatora, bahanganye n'igipolisi bamagana ibyayavuyemo
Abatavuga rumwe na leta muri icyo gihugu baravuga ko abantu babarirwa muri za mirongo baguye mu bikorwa by'urugomo byakurikiye ayo matora.
