Uburusiya bwihimuye kuri Amerika
Ahavuye isanamu, Getty Images
Ibiro by'uhagarariye Amerika mu Burusiya byasabwe kugabanya umubare w'abakozi babyo
Uburusiya bwihimuye kuri Leta Zunze Ubumwe z'Amerika kubera ibihano bishya yabufatiye, buyitegeka kugabanya abakozi b'ambasade yayo mu Burusiya bakagera kuri 455, bunayibuza gukoresha zimwe mu nyubako.
Umubare mushya w'abakozi b'ambasade y'Amerika mu Burusiya wahita ungana n'uw'abakozi b'ambasade y'Uburusiya muri Leta Zunze Ubumwe z'Amerika.
Minisiteri y'ububanyi n'amahanga y'Uburusiya yanavuze ko yafatiriye n'inzu zimwe na zimwe z'ikiruhuko n'izibikwamo ibikoresho z'abakozi b'ambasade y'Amerika.
Ibihano bishya Amerika yafatiye Uburusiya ni ibijyanye no kuba Uburusiya bwarigaruriye Crimea mu mwaka wa 2014 ndetse no kubera ibirego byo kwivanga mu matora y'Amerika.
Ibihano by'Uburusiya bifashwe nyuma y'amezi ubutegetsi bwa Perezida Obama butegetse ko hafatirwa inyubako ebyiri z'ambasade y'Uburusiya muri Amerika ndetse bukirukana abakozi 35 b'iyo ambasade.
Icyo gihe cyari nk'igisubizo cy'Amerika ku birego by'uko Uburusiya bwibye amabanga yo kuri mudasobwa ajyanye n'ibikorwa byo kwiyamamaza by'umukandida Hillary Clinton w'ishyaka ry'Abademokarate.
Itangazo ministeri y'ububanyi n'amahanga y'Uburusiya yashyize ahagaragara kuri uyu wa gatanu, rigira riti:
"Amerika iri gutera intambwe imwe ku yindi yiyenza ku Burusiya, ishingiye ku bintu bidafite ishingiro by'uko Uburusiya bwivanze mu butegetsi bwayo".
