Younes Abouyaaqoub ni we ucyekwa kugaba igitero i Barcelona

Igipolisi cyatangaje amafoto ya Abouyaaqoub, kivuga ko ari uwo kwitondera kandi ko ashobora kuba yitwaje intwaro Uwufise ububasha kw’isanamu POLICE HANDOUT
Image caption Igipolisi cyatangaje amafoto ya Abouyaaqoub, kivuga ko ari uwo kwitondera kandi ko ashobora kuba yitwaje intwaro

Igipolisi cyo muri Espanye cyemeje umwirondoro w'umushoferi ucyekwaho kwica abantu 14 mu gitero cyabereye mu mujyi wa Barcelona mu cyumweru gishize.

Cyavuze ko ari Younes Abouyaaqoub w'imyaka 22 y'amavuko.

Ubu noneho kumuhiga biri gukorerwa ku mugabane wose w'Uburayi.

Amashusho mashya yafashwe n'ibyuma bya kamera zicunga umutekano agaragara nk'amwerekana ahunga aho igitero cyabereye, agenda n'amaguru.

Umugore umwe yarapfuye mu gitero cya kabiri.

Kandi igipolisi kimaze no kwemeza umuntu wa 15 waguye mu gitero cy'i Barcelona, watewe ibyuma ari mu modoka ye.

Uwufise ububasha kw’isanamu EL PAIS
Image caption Amashusho ya kamera zicunga umutekano agaragara nk'ayerekana Abouyaaqoub ahunga aho igitero cyabereye, agenda n'amaguru

Mu kiganiro n'abanyamakuru cyo kuri uyu wa mbere, igipolisi cyanahishuye "ibimenyetso bikomeye".

Ko Imam Es Satty, umukuru w'umusigiti ucyekwa gucengeza amatwara mu rubyiruko rwagabye ibitero, yaba yarapfiriye mu guturika kwabereye mu nzu yifashishwaga nk'uruganda rw'ibisasu.

Umutwe w'iterabwoba wiyita leta ya kisilamu wavuze ko ari wo wagabye ibitero byo ku muhanda wa Las Ramblas i Barcelona ndetse no mu mujyi wa Cambrils.

Ariko ntibyahise bigaragara neza niba abagabye ibyo bitero barakoranaga n'uwo mutwe cyangwa hari uburyo bagenderaga ku mahame yawo.