Grace Mugabe: ubudahangarwa yahawe n'Afurika y'epfo bwamaganywe

Abigaragambya bateraniye mu murwa mukuru Pretoria bamagana icyemezo cyo guha ubudahangarwa Grace Mugabe Uwufise ububasha kw’isanamu AFP/Getty Images
Image caption Abigaragambya bateraniye mu murwa mukuru Pretoria bamagana icyemezo cyo guha ubudahangarwa Grace Mugabe

Ishyaka ry'ibanze ritavuga rumwe n'ubutegetsi muri Afurika y'epfo ryamaganye icyemezo cyo guha ubudahangarwa Grace Mugabe, umugore wa Perezida Robert Mugabe wa Zimbabwe, uregwa gukubita umuntu.

Ishyaka Democratic Alliance (DA) ryasabye ko hakorwa iperereza ry'inteko-nshingamategeko. Rishinja leta gukingira ikibaba "inshuti mbi" zayo.

Madamu Mugabe w'imyaka 52 y'amavuko, aregwa gukubita umunyamideli Gabriella Engels muri hoteli yo mu mujyi wa Johannesburg.

Ntacyo Madamu Mugabe arabivugaho ku mugaragaro.

Uwufise ububasha kw’isanamu AFP
Image caption Madamu Mugabe aregwa gukubita umunyamideli Gabriella Engels muri hoteli i Johannesburg

Perezida Mugabe n'umugore we bageze mu murwa mukuru wa Zimbabwe, Harare, ku cyumweru.

Willie Spies, umunyamategeko wunganira umunyamideli Engels, yabwiye BBC ko bazajuririra mu rukiko umwanzuro wa leta y'Afurika y'epfo wo guha ubudahangarwa Madamu Mugabe.

Avuga ko Madamu Mugabe atari akwiye gufatwa nk'umuntu udasanzwe kuko yari yagiye muri Afurika y'epfo ku giti cye.