Angola: Ishyaka MPLA riri ku butegetsi ryatsinze amatora

Bivuze ko João Lourenço wigeze kuba Minisitiri w'ingabo, ari we uzaba Perezida mushya wa Angola Uwufise ububasha kw’isanamu Reuters
Image caption Bivuze ko João Lourenço wigeze kuba Minisitiri w'ingabo, ari we uzaba Perezida mushya wa Angola

Kuri uyu wa gatanu akanama k'amatora muri Angola kavuze ko ibyavuye mu matora by'ibanze bigaragaza ko ishyaka MPLA riri ku butegetsi ryatsinze amatora y'abadepite yabaye ku wa gatatu, n'amajwi 61%.

Bivuze ko João Lourenço wigeze kuba Minisitiri w'ingabo, ari we uzaba Perezida mushya wa Angola.

Azasimbura Perezida José Eduardo Dos Santos wayoboye Angola mu gihe cy'imyaka hafi 40.

Akanama k'amatora kavuze ko ishyaka Unita ritavuga rumwe n'ubutegetsi ryabonye amajwi 27%.

Ishyaka Unita rirahakana amajwi yatangajwe n'akanama k'amatora.

Aka kanama karavuga ko kuri ubu amajwi agera kuri 98% by'abantu bose batoye yamaze kubarurwa.

Ariko gutora byo birakomeje kugera ku wa gatandatu. Byatewe nuko hagiye haba gukerererwa mu kubona impapuro z'itora mu biro by'amatora birenga icumi biri ahantu kure.

Ariko kuba ishyaka MPLA rifite intsinzi ingana gutyo, bivuze ko amajwi asigaye y'abatararangiza gutora ntacyo azahindura ku byatangajwe n'akanama k'amatora.

Amashyaka ahuriye mu rugaga Casa-CE yabonye amajwi hafi 10%.

Angola ni kimwe mu bihugu bicukurwamo peteroli nyinshi muri Afurika.

Ariko ubu Angola iri kurwana no kongera kwiyubaka nyuma y'intambara yamaze imyaka 27 hagati ya MPLA na Unita ikarangira mu mwaka wa 2002, yasize abaturage benshi mu bukene.