Afurika y'epfo yanenze "ubukerarugendo bwo kwivuza"

Dogiteri Motsoaledi yashimwe cyane n'Abanyafurika y'epfo kubera ko ajya kwivuza mu mavuriro y'abaturage yo muri Afurika y'epfo aho kwivuza mu bitaro byigenga Uwufise ububasha kw’isanamu AFP
Image caption Dogiteri Motsoaledi yashimwe cyane n'Abanyafurika y'epfo kubera ko ajya kwivuza mu mavuriro y'abaturage yo muri Afurika y'epfo aho kwivuza mu bitaro byigenga

Aaron Motsoaledi, Minisitiri w'ubuzima muri Afurika y'epfo, yanenze abategetsi b'Afurika bajya kwivuza hanze y'ibihugu byabo.

Igihe yavugaga ari mu gihugu cya Zimbabwe, yanenze icyo yise "ubukerarugendo bwo kwivuza".

Perezida Robert Mugabe wa Zimbabwe akunze kujya kwivuza hanze ya Zimbabwe, mu gihugu cya Singapore.

Yari yasohotse muri iyo nama y'abaminisitiri b'ubuzima igihe Dogiteri Motsoaledi yavugaga ayo magambo.

Umuvugizi wa Bwana Mugabe yavuze ko umuganga bwite wa Perezida Mugabe "usibye no kuba ari Umunyazimbabwe, mu by'ukuri ni n'umwirabura...Ni igikara cyane".

George Charamba, uwo muvugizi wa Perezida Mugabe, yavuze ibyo mu kinyamakuru cya leta, The Herald, mu kwezi kwa gatanu. Yashimangiye ko Perezida Mugabe atirengagiza amavuriro yo muri Zimbabwe.

Perezida Muhammadu Buhari wa Nigeria na Perezida wa Angola José Eduardo dos Santos, na bo baranenzwe uyu mwaka kubera kujya kwivuza hanze y'ibihugu byabo.

Uwufise ububasha kw’isanamu AFP
Image caption Perezida Muhammadu Buhari wa Nigeria yasubiye ku kazi ke muri uku kwezi kwa 8 nyuma yo kumara amezi atatu yivuriza mu Bwongereza

Muri iyo nama yabaye muri iki cyumweru, Dogiteri Motsoaledi yagize ati: "Ni twe mugabane wonyine ufite abategetsi bajya kwivuza hanze y'uyu mugabane wacu. Bigomba kudutera isoni".

Yongeyeho ati: "Ibi byitwa ubukerarugendo bwo kwivuza. Tugomba guteza imbere ibyacu".

Uwufise ububasha kw’isanamu AFP
Image caption Perezida Robert Mugabe wa Zimbabwe ubu afite imyaka 93 y'amavuko

Dogiteri Motsoaledi yanasabye leta kongera inkunga zigenera amavuriro y'abaturage.

Yashimwe cyane n'Abanyafurika y'epfo kubera ko ajya kwivuza mu mavuriro y'abaturage yo muri Afurika y'epfo aho kwivuza mu bitaro byigenga.