Zitto Kabwe agiye kuburana ari hanze

Depite Zitto Kabwe
Image caption Depite Zitto Kabwe

Umukuru w'abatavuga rumwe na leta muri Tanzania, Zitto Kabwe, yemerewe kuburana ari hanze nyuma yo gutabwa muri yombi kabiri uyu munsi.

Ubwa mbere yari yatawe muri yombi ashinjwa amagambo yo gutuma abaturage bigomeka kuri leta aherutse kuvugira muri meeting i Dar-es Salaam.

Yaje kurekurwa ariko mu nyuma yongera gutabwa muri yombi.

Amaze kurekurwa yabwiye abanyamakuru ko yasabwe kwitaba igipolisi kuwa kabiri w'icyumweru gitaha.

Azitaba kandi urukiko kugirango yisobanure ku byaha aregwa byuko yatangaje imibare itariyo no kunyuranya n'amategeko agenga ibyandikwa kuri interineti.

Bwana Kabwe ni umudepite mu nteko nshingamategeko akaba n'umukuru w'ishyaka rya Wazalendo rihanira ko mu gihugu haba amahinduka n'ibintu bigakorwa mu mucyo.

Imiryango iharanira uburenganzira bw'ikiremwamuntu ishinja leta ya Perezida John Magufuli kubangamira ukwishyira ukizana kw'abanyapolitiki.