Amakamyo yabujijwe kwinjira mu mujyi wa Mogadiscio

Ikamyo yuzuye ibintu biturika iherutse guhitana abantu 358 i Mogadishu. Uwufise ububasha kw’isanamu Reuters
Image caption Ikamyo yuzuye ibintu biturika iherutse guhitana abantu 358 i Mogadishu.

Leta ya Somalia yafashe icyemezo cyo kubuza amakamyo kwinjira mu mujyi wa Mogadishu ku manywa nyuma y'ibitero bibiri biherutse guhitana abantu benshi muri uwo mujyi.

Leta yizeye ko iki cyemezo kizatuma umutekano urushaho gucungwa neza muri kino gihe abantu bakomeje kuwucyemanga.

Abayobozi bo hejuru babiri bashinzwe umutekano birukanywe ku kazi nyuma yaho ku itariki ya 28 z'uku kwezi igitero gihitaniye abantu bagera kuri 27.

Ikindi gitero cyagabwe hashize ibyumweru bibiri cyahitanye abantu barenga 350 muri uwo mujyi.

Iki gitero cyagabwe ku itariki ya 14 z'ukwezi kwa cumi - cya mbere mu guhitana abantu benshi mu mateka ya Somalia - cyagabwe hakoreshejwe ikamyo yari yatezwemo ibintu biturika.

Umukuru w'umujyi wa Mogadishu, Thabit Abdi, yatangaje ko amakamyo atemerewe kunyura muri uwo mujyi hagati ya 07:00-20:00.

Abazanyuranya n'iki cyemezo ngo bashobora guhanishwa ihazabu ingana n'amadolari igihumbi.

Leta ya Somalia ivuga ko icyo gitero cyo ku itariki ya 14 z'ukwa cumi cyagabwe n'umutwe ugendera ku matwara akaze y'idini ya Islamu wa Al Shabaab.