Abanya Catalonia barasaba irekurwa ry'abanyapolitiki bafunze

Abakora imyigaragambyo baba bitwaje ibyapa bisaba ko imfungwa za politiki zifungurwa. Uwufise ububasha kw’isanamu Reuters
Image caption Abakora imyigaragambyo baba bitwaje ibyapa bisaba ko imfungwa za politiki zifungurwa.

Abanya Catalonia babarirwa mu bihumbi bakoraniye mu mujyi wa Barcelona mu yindi myigaragambyo isaba irekurwa ry'impirimbanyi n'abahoze ari abaminisitiri mu buyobozi bw'iyo ntara bashyigikiye ko yigenga.

Ubu bafunzwe na leta ya Espagne ariko abari mu myigaragambyo baravuga ko ari imfungwa za politiki.

Abanyapolitiki umunani bafunzwe mu rwego rw'iperereza ku byaha byo kwigomeka ku butegetsi no guhamagarira abaturage kwivumbura kuri leta.

Akaba ari ukubera icyemezo cy'inteko nshingamategeko ya Catalonia yatangaje ko iyo ntara yigenga nyuma ya kamarampaka ku bwigenge yahamagajwe n'ubutegetsi bw'ako karere ariko itari yemewe n'amategeko.

Ubushinjacyaha bwo mu Bubirigi burimo gusuzuma inyandiko zisaba guta muri yombi abandi bantu batanu bahoze mu buyobozi bwa Catalonia barimo n'uwari uyoboye iyo ntara, Carles Puidgemont.