Puigdemont yishyize mu maboko y'igipolisi

Uwufise ububasha kw’isanamu AFP
Image caption Carles Puigdemont wahoze ayobora intara ya Catalonia

Ubushinjacyaha bwo mu Bubirigi bwemeje ko Carles Puigdemont - wirukanywe ku buyobozi bw'intara ya Catalonia - n'abandi bahoze ari abaminisitiri be bane bishyize mu maboko y'igipolisi cy'icyo gihugu.

Umucamanza wo muri Espagne yabasohoreye kuwa gatanu inyandiko zo kubata muri yombi muri gahunda y'iperereza ku byaha byo kwigomeka no guhamagarira abaturage kwivumbura ku butegetsi nyuma yo gutangaza ubwigenge bw'iyo ntara.

Byitezwe ko bagezwa imbere y'umucamanza wo mu Bubirigi.

Mu byo kuwa mbere mu gitondo nibwo uwo mucamanza agomba kuba yemeje niba izo mpapuro zo guhagarika abo bantu zifite agaciro cyangwa niba abo bantu batanu bafungwa cyangwa se bakarekurwa mu gihe ikibazo cyabo kigwa.

Uwufise ububasha kw’isanamu AFP
Image caption Aba banyeshuri barasaba ko abari mu butegetsi bwa Catalonia batawe muri yombi bafungurwa.

Hagati aho abanya Catalonia babarirwa mu bihumbi bakoraniye mu mujyi wa Barcelona mu yindi myigaragambyo isaba irekurwa ry'impirimbanyi n'abahoze ari abaminisitiri mu buyobozi bw'iyo ntara bashyigikiye ko yigenga.

Ubu bafunzwe na leta ya Espagne ariko abari mu myigaragambyo baravuga ko ari imfungwa za politiki.

Abanyapolitiki umunani bafunzwe mu rwego rw'iperereza ku byaha byo kwigomeka ku butegetsi no guhamagarira abaturage kwivumbura kuri leta.

Akaba ari ukubera icyemezo cy'inteko nshingamategeko ya Catalonia yatangaje ko iyo ntara yigenga nyuma ya kamarampaka ku bwigenge yahamagajwe n'ubutegetsi bw'ako karere ariko itari yemewe n'amategeko.