Ubushinwa bwipfuza kwongereza ikiringo c'umukuru w'igihugu

Xi Jinping ni Prezida w'Ubushinwa kuva mu 2013

Ahavuye isanamu, EPA

Insiguro y'isanamu,

Xi Jinping ni Prezida w'Ubushinwa kuva mu 2013

Umugambwe uri ku butegetsi mu gihugu c'Ubushinwa wasavye ko ibwirizwa shingiro rihindugwa ngo bifashe umukuru w'igihugu n'icegera ciwe kuguma ku butegetsi ku biringo birenga bibiri.

Ikinyamakuru c'igihugu cavuze ko iyo nteguro yo guhindura ibwirizwa shingiro, yagaragajwe ku munsi wa Mungu.

Muri kino gihe, abarongora igihugu ntibashobora kurenza ibiringo bibiri vy'imyaka itanu kimwe.

Prezida w'Ubushinwa Xi Jinping, yitezwe gukinjura mu mabanga arimwo mu 2022, naho binugwanugwa ko ashobora gukora ukwo ashoboye ngo agume ari perezida mu gihe ataranashikiriza n'uwo musubirira.

(Bwana Xi yashize ubutegetsi ahanini mu minwe y'igisirikare, akagenzura itangazamakuru n'utugambwe dutoduto turi mu butegetsi, bigatuma benshi babona ko ariwe mutegetsi akomeye inyuma y'uwatanguje umugambwe w'abakomunista, Mao Zedong.)