Indege ya MH17 ngo yarashwe na misile y'Uburusiya

Igice k'indege cya Malaysia MH17 Uwufise ububasha kw’isanamu AFP/Getty Images
Image caption Igice cy'indege ya Malaysia MH17

Abakora iperereza ryo kumenya icyateye ihanuka ry'indege ya MH17 bahishuye ko yarashwe n'igisasu cyo mu bwoko bwa misile yo mu Burusiya yatewe n'umutwe w'ingabo z'Uburusiya zo muri Brigade ya 53.

Abantu 298 bari bari muri iyo ndege ya Malaysia Airlines bayitikiriyemo igihe yavaga I Amsterdam ijya I Kuala Lumpa ikarasirwa mu kirere cyo muri Ukraine mu kwezi kwa Karindwi muri 2014.

Uwufise ububasha kw’isanamu Getty Images
Image caption Ibice by'iyo ndege byasakaye ahantu hanini.

Abagize itsinda rikora iperereza rihuriweho n'ibihugu bakoresheje amafoto na za video ahanini bakuye ku mbuga nkoranyambaga kugirango bagaragaze gihamya.

Bashyize ibimenyetso birindwi ku gace k'igisigazwa cy'iyo ndege kabafashije kumenya neza uwarashe iyo misile.

Imibare iriho igaragaza ko yakorewe mu Burusiya.

Bifashije kandi abatangabuhamya barimo abakozi ba Brigade ya 53, imiryango ndetse n'inshuti.

Uwufise ububasha kw’isanamu Reuters
Image caption Iki ni kimwe mu bice by'iyo ndege byabonetse aho yaguye.

Indege ya MH17 yarasiwe mu kirere kiri hejuru y'agace kagenewe kurasirwaho za misile mu Burusiya ku mupaka icyo gihugu gihana na Ukraine.

Icyo gisasu kikaba cyaraturutse mu gace karimo Brigade ya 53 y'Uburusiya ahantu hagenzurwa n'inyeshamba zishaka kwivana kuri Ukraine icyo gihe bari bashyigikiwe n'Uburusiya.

Abashinjacyaha bemeje ko batahuye abantu barenga icumi bakekwa ariko banze gutangaza amazina yabo mu rwego rwo kwirinda kubangamira iperereza iryo ariyo ryose.

Ukekwa wese azakurikiranwa n'urukiko rwo mu Buholandi nyuma yaho Uburusiya bubangamiye ishyirwaho ry'urukiko mpuzamahanga buvuga ko rwakoreshwa ku nyungu za politike.

Ubucamanza bwo mu Buholande bufite ububasha bwo kuburanisha abantu badahari; bisobanura ko urubanza rushobora kuzaba no mu gihe igihugu abakekwa barimo cyakwanga kubohereza ngo baburanishwe.

Ibindi bisa n’ibi