Amerika yikuye mu kanama k'uburenganzira bwa muntu ka ONU

Uhagarariye Amerika mu muryango w'abibumbye, Nikki Haley, avuga ko aka kanama gakingira ikibaba abahungabanya uburenganzira bwa muntu

Ahavuye isanamu, EPA

Insiguro y'isanamu,

Uhagarariye Amerika mu muryango w'abibumbye, Nikki Haley, avuga ko aka kanama gakingira ikibaba abahungabanya uburenganzira bwa muntu

Leta Zunze Ubumwe z'Amerika zaretse kuba umunyamuryango w'akanama k'uburenganzira bwa muntu k'umuryango w'abibumbye, zikaba zigashinja kuba "ingarani yo kubogama mu bya politiki".

Uhagarariye Amerika mu muryango w'abibumbye, Nikki Haley, yavuze ko aka kanama k'uburenganzira bwa muntu kagizwe n'"abantu b'indyarya kandi bakorera inyungu zabo bwite".

Madamu Haley yongeyeho ko ibyo bituma aka kanama kaba "ugusebya uburenganzira bwa muntu".

Aka kanama k'uburenganzira bwa muntu kashinzwe mu mwaka wa 2006. Kakaba gafite icyicaro i Genève mu Busuwisi.

Kakunze kunengwa kuba kemerera kuba abanyamuryango ibihugu bikemangwa ku birebana no kubahiriza uburenganzira bwa muntu.

Ariko impirimbanyi z'uburenganzira bwa muntu ziravuga ko kuba Amerika yaretse kuba umunyamuryango w'aka kanama, bishobora kubangamira ibikorwa byo kugenzura no gukemura ibibazo byo kutubahiriza uburenganzira bwa muntu ku isi.

Umunyamabanga mukuru w'umuryango w'abibumbye, António Guterres, yasohoye itangazo abinyujije ku muvugizi we, avuga ko yari kwishimira ko Amerika ikomeza kuba umunyamuryango w'aka kanama.

Naho Zeid Ra'ad Al Hussein, umukomiseri ushinzwe uburenganzira bwa muntu mu muryango w'abibumbye, we yavuze ko kuba Amerika yikuye muri aka kanama ari "inkuru ibabaje ariko mu by'ukuri idatunguranye".

Hagati aho igihugu cya Israel cyo cyashimye icyemezo cy'Amerika cyo kwikura muri ako kanama.